by L’Assemblada Occitana qu’ei d’acòrdi dab la navèra lei francesa qui punish la discriminacion de las personas segon los lors accents. Que vien d’ua iniciativa deu deputat occitan Cristòl Euset (Christophe Euzet).
Mes la question vertadèra que despassa de luenh los accents: qu’ei urgent de lançar ua lei d’oficializacion, de promocion, d’ensenhament e de non-discriminacion de las lengas minorizadas coma l’occitan, lo còrs, lo catalan, lo breton, lo basco, l’arpitan o l’alemand d’Alsàcia-Lorena qui son a l’origina d’aqueths accents en francés.
Qu’èm milions d’occitans qui parlam francés dab un accent occitan (dit “accent meridionau”) e qu’ei inacceptable que siam escarnits. Mes, sustot, qu’èm milions d’occitans qui non avèm pas dreit de parlar en lenga occitana dens certans domenis de la vida publica, ni d’aprene l’occitan liurament. L’estat francés, uei lo dia, qu’elimina los cors d’occitan dens l’ensenhament public!
Ací quauques remarcas addicionalas entà clarificar lo debat actuau.
- La discriminacion deus accents en francés qu’a recebut lo nom estranh de “glotofobia”. Qu’ei un tèrme inapropriat, difusat per l’autor antioccitan Felip Blanchet.
- La “glotofobia” qu’ei un tèrme qui amaga la realitat francesa. Que concernish solament quauques reflexions sus l’accent ”folcloric”,”non parisenc” de las personas.
- Atau no’s parla pas deu racisme intèrne dens la societat estatala francesa: qu’ei l’endofobia (l’òdi de l’interior), e en particular qu’ei l’antimeridionalisme qui a consequéncias istoricas dramaticas peus occitans.
- L’endofobia qu’ei creada per la paur de çò qui ei intèrne a la societat. En França que s’exprimish per lo refús d’acordar dreits a la diferéncia a personas e grops qui son considerats coma francés. Dementre, los grops estrangèrs que pòden profeitar de mei de dreits (cors d’anglés balhats pertot a l’escòla publica, qui barra a l’encòp los darrèrs cors d’occitan).
- Los endofòbs qu’an paur pr’amor que saben que l’estat-dit-nacion francés ei ua creacion fragila deu poder, coma tot país non omogenèu.
