Non au “Cai Napoleon” a Niça!

Lo 20 d’octòbre passat, la comuna de Niça donèt lo nom de “Cai Napoleon” a una part dau pòrt de la vila. Es deplorable que la comuna de Niça glorifique un tau personatge.

L’institucion de la Republica de Niça (RFÒC) a protestat legitimament còntra aquela decision. En respondent a la protèsta, lo conselhier municipau Gaèl Nofri s’engana completament: que pretende que “Niça es una vila francesa” que “per definicion, lia lo sieu destin […] a una istòria nacionala qu’englòba Napoleon”, e aponde finda que Napoleon auria portat “un sofle de libertat” e de “revolucion”…

En realitat, lu fachs demòstran que Napoleon Ir es una figura sinistra de l’istòria.

• Napoleon menèt de guèrras de conquista afroï en Euròpa. Causèt de mòrts e de sofrenças infinidi ai populacions.

• Napoleon installèt de regims politics autoritaris, en contradiccion totala embai principis democratics iniciaus de la Revolucion dau 1789.

• Napoleon organizèt l’ocupacion militara francesa dins la Comtat de Niça dau 1792 au 1814. Finda pretendèt suprimir la nòstra bandiera de Niça emb l’aigla. Lo primier restacament de la Comtat de Niça a l’estat francés en lo 1792, sota Napoleon Ir, èra una annexion forçada, luenh de tota libertat. Lo segond restacament de Niça a França en lo 1860, sota Napoleon III, foguèt una novèla annexion forçada, desguisada en referendum manipulat.

L’Assemblada Occitana non es d’acòrdi emb la decision de la comuna de Niça, apròva la protèsta legitima de l’institucion de la Republica de Niça (RFÒC) sus aqueu tèma e la felicita per aver mediatizat aquel afaire.

Per la mesma ocasion, sostenèm la crida en linha lançada per remplaçar lo nom de Cai Napoleon per aqueu de Cai Garibaldi.

Niça es una part de la nacion occitana, non de la nacion francesa. Volèm bastir a Niça, coma dins l’ensemble dau país d’Occitània, una democracia exemplara e umanista.