22.05.2024

Legislativas: lo PNO pacheja amb l’antioccitanisme

L’Assemblada Occitana a totjorn desirat de bònei relacions amb leis autrei grops de l’occitanisme politic, e en generau a ben capitat.

Malaürosament, per leis eleccions legislativas de 2022, dos movements occitans —Occitanie-País Nòstre e lo Partit de la Nacion Occitana (PNO)— an abandonat lei valors essencialas de l’occitanisme en intrant dins una “Federacion dei País Units” que, dedins, i a una organizacion escura que pretend exclure Provença d’Occitània.

De fach, lo PNO e Occitanie-País Nòstre se plaçan en defòra dau nacionalisme occitan e en defòra de tot l’occitanisme.

L’Assemblada Occitana pren acte d’aquela causida pietadosa e ne profiecha per clarificar sa posicion:

1) L’Assemblada Occitana es estacada a la memòria de Francés Fontan (lo fondador dau PNO), de Robèrt Lafont e de Frederic Mistral: segon aquelei grands òmes, Provença es ben una part d’Occitània e lo provençau es una varietat de la lenga occitana.

2) L’Assemblada Occitana deplora que lo PNO aja renonciat au principi d’unitat dau país d’Occitània e qu’aja traït leis idèas dau sieu fondador Francés Fontan. Lo PNO pòt pas pretendre que defend la “nacion occitana” quand s’alia amb de gents que vòlon exclure Provença d’Occitània.