L’òrre murtre d’un policier a Avinhon

L’Assemblada Occitana es escandalizada per lo murtre dau policier Eric Masson, qu’un trafegant de dròga lo tuèt frejament lo 5 de mai a Avinhon (Provença, Occitània). Coma sempre, sostenèm lei policiers e lei gendarmas cada còp que fan un trabalh seriós e que prenon de riscs per protegir la populacion.

Lo murtre d’Eric Masson es un exemple, entre tanteis autres, de l’aumentacion insuportabla de la violéncia demieg lei “pichons” nèrvis. Lei delinquents de basa se sarran de mai en mai dau grand banditisme. Lei luòcs de venda de la dròga son fòrça ben coneguts, causan de desòrdres fòrça ben coneguts; e pasmens lei dirigents coards de l’estat francés laissan prosperar aqueu trafec que menaça la vida dei policiers e dei ciutadans ordinaris.

L’Assemblada Occitana es partisana d’una politica pus ferma e pus metodica dins la lucha còntra aquelei delinquents de basa. Tanben cau durcir la lucha còntra lo grand banditisme, sembla que i aja de liames entre lo grand banditisme e certanei personas en posicion elevada. La polícia e la gendarmariá meritan de condicions de trabalh melhoras per complir sa mission de proteccion de la populacion, en combinant la deontologia e l’eficacitat. En parallèl a la repression necessària, una politica sociala audaciosa tanben fa mestier per eradicar lei causas de la delinquéncia.

Daissar un comentari

Vòstra adreça de messatjariá serà pas publicada.