by Coma o preveïa l’Assemblada Occitana, li eleccions presidenciali francesi an menat a la repeticion dau scenari dau 2017: lo neoliberalisme de Macron fàcia au neofaissisme de Le Pen.
Si podèm questionar sus li rasons que menan una majoritat d’electors a votar per doi candidats tan contestables:
- Emmanuel Macron a pas cessat, durant lo sieu mandat, d’aplicar de mesuras repressivi, liberticidi, antisociali e antiecologiqui.
- Marine Le Pen, non solament a d’idèas faissistas inacceptabli, mas tanben es banhada dins divèrs afaires de corrupcion. En mai d’aquò, a finançat li sieus campanhas electorali en manlevant 8 milions d’èuros a una banca privada russa tenguda per d’ancians militars pròches de Putin.
- Lu partits dei doi candidats còmptan de personalitats implicadi dins d’escàndols de corrupcion e d’agressions divèrsi (sexuali, racisti).
Motivada per la recèrca d’audimat e li manòbras de certans magnats de la premsa per manipular l’opinion publica, la complasença dei mèdias devèrs l’extrèma drecha a contribuit a establir una basa electorala neofaissista duradissa dins lo païsatge politic de l’estat francés.
L’immensa majoritat de l’electorat d’Occitània (dei Alps a l’Atlantic e de Borbonés ai Pirenèus) non a minga possibilitat de votar de maniera liura e esclairada. Lu elegeires occitans son endoctrinats per l’estat e lu mèdias francés: si son exprimits en favor de candidats ultrajacobins que mesprèan la cultura occitana e que vòlon faire desaparéisser la lenga nòstra.
Notam pura l’existéncia d’una especificitat occitana que nos fa esperar la perspectiva futura d’una basa electorala interessanta per l’occitanisme:
- Es en Occitània que si tròba la màger part dei comunas que Jean-Luc Mélenchon i es en tèsta, dont li mai importanti: Marselha e Tolosa. Es una paradòxa. Sabèm ben que Jean-Luc Mélenchon es un jacobin e un enemic de l’occitan. Mas lo sieu succès dins aqueli comunas occitani laissa creire que i a una reala volontat populara occitana de trobar una alternativa a Macron e Le Pen.
- Joan Lassala a rassemblat mai d’un milion de votz e mai es arribat en tèsta dins manti comunas de Gasconha. Joan Lassala es una personalitat controvertida que ten d’idèas complotisti e qu’es estat acusat de sexisme. Mas lo sieu programa locau, e mai se mençona pas explicitament l’occitan, a plagut a fòrça occitanas e occitans.
L’Assemblada Occitana crida a establir una fòrça politica occitanista ambicioa, capabla de mobilizar duradissament l’electorat occitan darrier un projècte independentista, sociau, equitable, ecologista e umanista.
