Presidencialas francesas: lo retorn de la mascarada electorala

A l’apròche de las eleccions presidencialas de l’estat francés, nos avesinam devèrs una probabla repeticion dau scenari de 2017: un segond torn emb Emmanuel Macron (drecha neoliberala) e Marine Le Pen (ultradrecha).

E tornarmai, l’electorat occitan serà constrench de chausir entre dos candidats que mesprèsan dubèrtament las classas mejanas e popularas, e maitot las nacions minorizadas dont la nacion occitana. Tornarmai paiarem los resultats de las mesuras liberticidas, antisocialas e antiecologicas dau poder. Tornarmai paiarem las consequéncias de la complasença de tant de mèdias qu’an banalizat los fantasmas de l’ultradrecha.

L’Assemblada Occitana es un movement engatjat dins la defensa daus abitants d’Occitània tota, daus Aups a l’Atlantic e de Borbonés aus Pirenèus.

De tots los candidats que se presentan a l’eleccion, tres son los mai pròches de nòstras idèas: Yannick Jadot (EELV), Felip Poton (NPA) e Fabien Roussel (PCF). D’efiech, son ilhs que defendon mai clarament la lenga occitana e las autras lengas minorizadas. Tanben son partisans en generau dau respècte de l’environament, de la justícia sociala e de las libertats regionalas e individualas.

Fasèm observar que Jean-Luc Mélenchon es contra l’occitan. Tanben, Emmanuel Macron es contra l’occitan, contra la justícia sociala e contra l’environament.

Mas en realitat, pas un candidat non portarà jamai daus chamjaments favorables a la causa occitana:

  • Perque d’en primier, lo sistèma electorau francés establís una mena de monarquia electiva republicana —eiretatge bonapartista unic en Euròpa— en fisant tots los poders a una soleta persona inatacabla.
  • E d’en segond, perque lo païsatge politic de l’estat francés es monopolizat per la pensada chauvinista francesa de natura parisenquista, centralista, retrograda, autoritària, discriminanta e minada per los afars de corrupcion.

Per consequent, l’Assemblada Occitana se sent pauc concernida per las eleccions presidencialas francesas. Los chamjaments necessaris se faràn sustot aicí, dins nòstra societat occitana, emb los movements occitanistas, sociaus, civics e ecologics.

Daissar un comentari

Vòstra adreça de messatjariá serà pas publicada.