Sosten a Ucraïna, als refugiats e als democratas russes

L’Assemblada Occitana s’assòcia a la resolucion de l’ÒNU per demandar l’arrèst immediat de la guèrra en Ucraïna que tòca de populacions innocentas e que destabiliza nòstre continent europèu. Tanben demanda lo retirament total de las fòrças armadas russas de tot lo territòri d’Ucraïna e que cèssen las menaças nuclearas que se son ausidas de diferents costats.

L’Assemblada Occitana apèla a sosténer totas las populacions d’Ucraïna que sofrisson de la guèrra, siá en lor mandant d’ajuda umanitària, siá en facilitant lor aculhença aicí en Occitània.

Los refugiats que sòrton d’Ucraïna devon poder trobar l’asil e la proteccion en Occitània e en Euròpa. Es just que benefícien de transpòrts gratuits e de suènhs gratuits dins l’emergéncia actuala.

En mai d’aquò, es inacceptable que certans refugiats d’Ucraïna sián discriminats a causa de lors originas africanas o asiaticas.

Sostenèm lo drech dels ucraïneses e dels tatars de Crimèa a l’autodeterminacion: aqueles dos pòbles an drech de se causir liurament lor futur e lor organizacion politica, sens subir de pressions exterioras ni de menaças militaras.

Sostenèm tanben los democratas de Russia que manifèstan contra la guèrra e la dictatura de Vladimir Putin.

Daissar un comentari

Vòstra adreça de messatjariá serà pas publicada.