by A Marselha, de centenats de personas an començat un grand procès collectiu còntra lei dentistas Lionèl e Carnot Guedj. Lei dos practicians son acusats d’aver mutilat de centenats de pacients e de s’enriquir en fasent d’operacions innombrablas, brustiadas e innecessàrias. Leis denóncias juridicas an començat tre 2012 e tròp de victimas an sofèrt dempuei dètz ans.
L’Assemblada Occitana demanda que la justícia siá exemplara dins aqueste afaire per protegir lei victimas. Es necessari d’establir una juriprudéncia eficaça còntra lei derivas dei charlatans.
Tanben L’Assemblada Occitana demanda que lei victimas recépian l’ajuda medicala publica que revendican dempuei d’annadas, per fin de reparar leis operacions dentàrias mau fachas, en atendent que la justícia determine lei copables. D’efiech, la màger part dei victimas venon dei classas socialas popularas e an pas lei mejans de se pagar de suenhs dentaris de rectificacion. Subisson de sofrenças fisicas dempuei tròp lòngtemps e an pas mai de vida normala.
Aqueste afaire mòstra lei derivas preocupantas de certanei maufatans dins lo domeni dentari e medicau, bòrd qu’aquelei nèrvis escapan ai contraròtles e profiechan de la vulnerabilitat dei populacions pauras.
L’Assemblada Occitana es partisana d’una medecina e d’un sistèma dentari mielhs contrarotlats, amb una proteccion sociala melhora per lei classas modèstas e lei classas mejanas.
