by A l’ocasion dau 1r de mai, l’Assemblada Occitana exprimís tornamai son sosten ai revendicacions socialas dei corsets jaunes e dei trabalhadors en generau.
- Per una fiscalitat suportabla e equitabla.
- Per que lei gents dei classas mejanas e popularas pòscan anar au trabalh en veitura sens se roïnar en benzina.
- Per escorchar lei distàncias entre lei luecs de residéncia e de trabalh.
- Per la transparéncia de la vida politica.
- Per una gestion decentralizada dei servicis publics e dau desvolopament economic: volèm una politica pròcha dei ciutadans e dei regions.
- Per ne’n finir amb la desertificacion dei campanha, en li donant d’equipaments publics complets e de realas chanças de desvolopament.
- Per la convergéncia dei luchas legitimas entre corsets jaunes, ecologistas e sindicats.
- Per lo retorn ai 90 km/h sus lei rotas nacionalas (sens renonciar ai imperatius de la seguretat rotiera).
Deploram que lo president Macron, dins son discors mancat dau 25 d’abriu, siágue demorat sord ai revendicacions principalas dei corsets jaunes. Condemnam la manipulacion e la censura dau pretendut « grand debat ». Siam tanben en ràbia perque Macron refusa de reconéisser lei minoritats etnolingüisticas, çò qu’es pertant una revendicacion clarament exprimida dins lo « grand debat ».
Cridam lei corsets jaunes e lei fòrças de l’òrdre a la compreneson mutuala. Lei corsets jaunes an lo drech legitim d’exprimir sa ràbia sociala.
- La mission dei fòrças de l’òrdre es de garentir la seguretat dei manifestants, pas de lei reprimir. Exigissèm que lei policiers e gendarmas agissen amb discerniment e dins lo respècte dei drechs umans. Sus aqueu tèma, condemnam leis òrdres escandalós de repression que l’estat transmet ai policiers e gendarmas.
- Condemnam fèrmament lei ferriduras, mutilacions e brimadas innombrablas que certans policiers an infligit a de miliers de manifestants pacifics. Siam solidaris amb lei corsets jaunes agressats, amb la militanta Genevièva Legay de Nissa, amb la jove filha au crani fracassat a Marselha, amb lo militant breton Jonathan Le Bris e sa familha e amb tant d’autres que sofrisson de la violéncia estatala…
- Mai en parallèl, lei corsets jaunes devon facilitar un raprochament amb lei policiers e gendarmas de bòna volontat. Cau trobar un terren comun amb lei gendarmas e policiers que luchan per de melhoras condicions de trabalh. Demandam ai corsets jaunes de defugir leis elements violents, extremistas e provocators. Siam pas d’acòrdi amb certans corsets jaunes que cridan ai policiers: « Suicidatz-vos. » Au contrari, sostenèm aquelei corsets jaunes, mai visionaris, que cridan ai policiers: « Vos suicidetz pas, rejonhetz-nos! »
