22.05.2024

Copa dau Mond de fotbòl 2022 en Qatar: l’Assemblada Occitana crida au boicòt!

L’Assemblada Occitana denóncia l’organizacion de la Copa dau Mond dau 2022 en Qatar e crida au boicòt.

La Copa dau Mond dau 2022 l’an atribuida a una petromonarquia dictatoriala, nepotica e retrograda en seguida d’actes de corrupcion e d’abús d’influéncia que pertocarian de personalitats aut plaçadi de la FIFA e de la politica francesa.

Regarjar la Copa dau Mond dau 2022 en Qatar e suportar l’Esquipa de França ò la Seleccion Espanhòla constituisson una quintupla alienacion: umanament, socialament, ecologicament, politicament e nacionalament.

  • Umanament, es caucionar l’esplecha e la mòrt de miliers de trabalhadors migrants pendent la construccion dei estadis.
  • Socialament, es caucionar li condicions de trabalh inumani qu’an patit aquelu trabalhadors migrants qu’an pas manco recebut lo sieu salari.
  • Ecologicament, es caucionar l’aberracion ecologica que representa l’organizacion d’aquela competicion dins una region non adaptada per aquò, e li consequéncias desastroï per l’environament qu’aquò entraïnarà.
  • Politicament, es caucionar la dictatura islamista de Qatar dau mesme biais que si caucionèt lo regim terrorista de Putin (Copa dau Mond dau 2018) e la dictatura militara argentina dau Generau Videla (Copa dau Mond dau 1978).
  • Nacionalament, suportar l’Esquipa de França ò la Seleccion Espanhòla de fotbòl, es revendicar la sieu apartenéncia a d’estats que nègan la realitat nacionala d’Occitània e que cèrcan de destruire la lenga e la cultura occitani.