Solidaritat e sangfreid fàcia al coronavirus

Comunicat · 12.03.2020 (actualizat lo 16.03.2020)

L’Assemblada Occitana demanda de seguir las mesuras de confinament que s’aplican dins totas las partias d’Occitània:

L’Assemblada Occitana encoratja a resistir e a gardar lo sangfreid fàcia a las menaças creissentas del coronavirus.

Apelam la populacion a aplicar las mesuras de proteccion sanitària e a collaborar amb las autoritats. Es necessari de seguir las consignas oficialas d’igièna, de confinament e de distància entre las personas, segon çò que ditz chasca autoritat locala. Es una emergéncia mondiala ont respectarem las ordenanças per nòstra salut e aquela dels vesins.

La progresion ultrarapida del Covid 19 demòstra que chal injectar sus lo còp de mejans excepcionals dins los espitals: fòrça mai de personal, fòrça mai de material e fòrça mai d’argent public.

Los govèrns deuràn puei pensar de defendre los pòsts de trabalh e l’economia. Nòstras Valadas Occitanas son estaas la primiera zòna tochaa d’Occitània per las mesuras especialas. Cèrtament, dins nòstras Valadas, siam estats perplèxes de veire que, dissande 7 de març, fòrça personas son venguas per esquiar en arribant dempuei Milan e Bergam ont lo virus èra ja fòrt.

Deploram la vision dels estats (dichs “estats nacion”) qu’abandonan lor mission de proteccion dels pòbles. Los espitals son submergits pr’amor que los estats non an pas vougut balhar los mejans d’aver un servici public capable de respondre a una crisi ansin. Tanben an ignorat l’egalitat de tractament entre los territòris.

Totun, aüra, es pas ora de multiplicar de novèlas polemicas. Es ora de refortir la solidaritat, l’organizacion e la collaboracion entre tot lo mond.

Poèm aver de resèrvas sus certanas mesuras pontualas de santat publica, mas lo sangfreid e la proteccion de totes son las prioritats.

ASSEMBLADA OCCITANA

13090 AIS DE PROVENÇA

www.assemblada.org

info@assemblada.org

+33 7 83 41 11 12

Daissar un comentari

Vòstra adreça de messatjariá serà pas publicada. Los camps obligatòris son indicats amb *