by L’Assemblada Occitana avisa amb una prefonda tristesa la renaissença e lo progrès constant dels chauvinismes.
Mentre que se difond, de nacion en nacion, lo coronavirus, se difond tanben lo vergonhós chauvinisme amb de messatges venent dels chaps de govèrns e dels politicians coneguts, de tipe “Itàlia o farà”, “França ganharà aquesta guèrra còntra lo coronavirus”, “Espanha es a reagir”. Dementre, l’estat espanhòl recentraliza son poer e frena las iniciativas de las comunautats autonòmas. Sus la rets socialas, de di en di se difondon de messatges chauvins: “crompa italian”, “manja francés”, “serem una nacion fòrta, la nacion espanhòla”. Dempuei los balcons de nòstres ostals i a las bandieròlas dels estats nacion e se chantan los imnes nacionals.
Tot en comprenent que dins lo moment dificil que siam es absoluament necessari e obligatòri de respectar las directivas dels govèrns e de las autoritats sanitàrias, fa mal de beicar la preocupanta renaissença dels chauvinismes. Al moment que lo Mond entier a un enemic comun de batre, s’auçan de nòvas muralhas, se contruson de vielhas frontieras, se favorizan de nòus fogiers de racisme.
A nosautres de l’Assemblada Occitana nos fa mal de veire coma lo govèrn francés se balina l’idèa de devesir Occitània en remontant las frontieras e en suspendent lo Tractat de Schengen, mesura qu’empedís la continuitat territoriala d’Occitània.
Nosautres de l’Assemblada Occitana vivèm amb preocupacion la renaissença dels chauvinismes que pensam que pòon aver de consequéncias verament gròssas dins un periòde mejan o lòng. Aüra es ora de se sentir encara mai ciutadans del Mond, d’Euròpa e d’Occitània.
Coma Assemblada Occitana, demandam solemnament als govèrns de França, d’Itàlia e d’Espanha de donar pas d’alen als chauvinismes amb d’eslogans que ne favorizan la renaissença.
Los primiers efiechs d’aquesta nòva ondaa chauvina se veon ja dins las Valadas Occitanas de l’estat italian, ont los servicis sanitaris son a intrar en crisi a causa dels blocatges impausats al transit dels materials sanitaris (coma las mascas e los respiraors) vèrs lo territòri de l’estat italian. L’Assemblada Occitana condemna aqueste comportament dels estats nacion e demanda la redobertura immediata de las frontieras almens per los bens alimentaris e sanitaris.
Siam pacifistas e volèm evitar una deriva militarista. Coma tot lo pòble occitan, capissèm pas e acceptam pas las menaças de desplejar los soldats per charrieras dins nòstres vilatges e vilas per afrontar l’emergéncia sanitària en cors. L’Assemblada Occitana sosten los esfòrç dels govèrns per restancar la crisi sanitària e economica a l’orizont. Demanda de redobrir los plantoliers e de poer vendre al detalh las semenças per l’agricultura domètja, que poiriá jogar un ròtle fondamental per afrontar la crisi economica venenta.
L’Assemblada Occitana confirma e mai son apèl ferme e convencut a respectar las mesuras de confinament suggerias per l’OMS e impausaas per los govèrns.
