by Aprenèm amb dolor la despartida de Bernat Molin (1948-2020) qu’es reconegut coma un dei melhors lingüistas de l’occitan modèrne e que faguèt, en parallèl, una carriera remarcabla de professor de matematicas. L’Assemblada Occitana planh lo dòu a sa familha e a seis amics.
Seis amics an explicat au jornau Aquò d’Aquí que moriguèt lo 27 de març a causa d’un càncer foudrejant.
Bernat Molin èra originari de Vals, en Vivarés, e demorava a Ais de Provença.
Tot en essent professor agregat e doctor en matematicas, compliguèt un trabalh infatigable en lingüistica occitana. A laissat d’obratges de granda rigor scientifica e pedagogica, solet o amb de collaboradors, que sei publicacions son vengudas de grandei referéncias. En particular:
- Grammaire provençale et cartes linguistiques, escricha en collaboracion amb Guiu Martin, editada a Ais de Provença en 1998 e reeditada en 2007 (una primiera version, ja en 1983, s’entitolava Grammaire du provençal rhodanien et maritime).
- Dictionnaire de base français-provençal / Diccionari de basa francés-provençau, escrich en collaboracion amb Elias Lèbre e Guiu Martin, editat a Ais de Provença en 1992 e reeditat en 2004.
- Grammaire occitane: le parler bas-vivarois de la région d’Aubenas, editada en 2005.
Bernat Molin èra membre de l’Institut d’Estudis Occitans (IEO) e dau Congrès Permanent de la Lenga Occitana.
Participava a d’activitats culturalas pròchas de la populacion. Foguèt una figura eminenta dei dictadas occitanas. Ajudèt a desvolopar Wikipèdia en occitan. Tot lo mond presava son grand saber pendent lei rescòntres dau Cafè Provençau, a Ais.
En mai de sei qualitats scientificas, Bernat Molin aviá un caractèr tras qu’agradiu, modèst, diplomatic e constructiu. Cultivem sa memòria.
