by Lo 27 de febrièr de 2025, an suspendut las òbras de l’autoestrada A69 en Lengadòc après que lo tribunal administratiu de Tolosa a anullat las autorizacions environamentalas.
L’Assemblada Occitana saluda aquesta decision e la tròba justa. Per remembrança, lo projècte de l’A69 trebola grèvament l’environament e la biodiversitat; pòrta pas profièch a la populacion locala dels territòris pertocats que, d’alhors, i es majoritàriament opausada.
Planhèm, ça que la, que lo jutjament siá estat tan tardiu. A laissat temps als promotors del projècte d’avançar las òbras e de faire pro de degalhs:
- Ja an expropriat 820 personas.
- Ja las esplechas agricòlas son talhadas en dos per lo trajècte de l’A69.
- Ja la vegetacion es completament destrucha.
- Ja lo jaç freatic es durament afectat.
En mai d’aquò, las entrepresas implicadas deploran qu’ajan ja investit 300 milions d’èuros sus los 450 previstes e qu’ajan ja realizat lo 55% del terrassament e lo 70% dels obratges d’art. De milièrs d’interimaris son estats licenciats.
Qui son los colpables d’aquesta situacion?
Indiscutiblament son los promotors del projècte; e especialament lo grop Pèire Fabre, que n’es a l’origina e qu’a fach de lobbyisme al près dels decideires politics, tan locals coma estatals, per fin que l’autoestrada siá declarada d’utilitat publica.
Son colpables tanben los decideires politics qu’an sostengut sens nuança lo projècte, malgrat los avertiments d’un fum d’organizacions environamentalas e de personalitats scientificas; e tanben, malgrat lo vejaire de la populacion locala dont lo 60% rebuta lo projècte.
Son colpables, enfin, los magistrats qu’an refusat totes los recorses de las associacions opausadas al projècte; ansin aqueles jutges an validat las autorizacions environamentalas que permetián d’executar aqueste projècte ecocida.
Pasmens, e mai s’es tardiu, l’arrèst de las òbras demòra una victòria per l’environament. La perseguida de las òbras e l’acabament de l’autoestrada aurián de consequéncias catastroficas per la natura.
Mas la batèsta es pas acabada. Lo 24 de març passat, l’estat francés a anonciat que s’apèla de la decision del tribunal administratiu de Tolosa. De mai, certans deputats e senators partisans de l’autoestrada parlan de faire una propòsta de lei per fin de contornar la decision de justícia.
Aqueste acarniment de l’estat francés constituís una deriva autoritària inacceptabla.
Fòto: APB11
