by Lo 24 de novembre de 2024, l’eleccion presidenciala romanesa foguèt invalidada e anullada per la Cort Constitucionala. Òm constatèt d’irregularitats pertochant l’origina dels fons utilizats per promòure la campanha de Călin Georgescu, un candidat d’extrèma dreita pròrús qu’aviá ganhat per surpresa al primèir torn.
De documents desclassificats meton en evidéncia l’implicacion de Russia dins la manipulacion de l’escrutini; aquò preniá mantas formas:
- Una societat ecran aviá creat 5 000 faus comptes de sosten sobre TikTok.
- Las publicacions de Georgescu venguèron viralas gràcias a de finançaments escurs.
- Recorreguèron a d’influenciaires en los paiant amb de fons del compte de campanha.
- Utilizèron d’afichas de campanha sens comanditari identificat.
- I aguèt de ciberatacas contra lo procès electoral.
L’eleccion presidenciala se tendrà tornarmai en mai de 2025. Călin Georgescu e Diana Șoșoacă, una autra candidata d’extrèma dreita, ne son estats exclús.
L’Assemblada Occitana saluda las decisions de la Cort Constitucionala romanesa. Son de decisions coratjosas e exemplaras.
Una democracia fòrta se deu mostrar intransigenta fàcia a tota irregularitat e temptativa d’ingeréncia estrangèira quina que siá. Ja, la democracia dels Estats Units auriá degut invalidar, abans 2024, la candidatura de Donald Trump per traïson e per temptativa de còp d’estat.
Atanben, devèm pas tot acceptar en nom de la democracia e de la libertat d’expression.
Devèm pas acceptar que se pòschan presentar de candidats extremistas, dangeirós e antidemocratics.
Devèm pas acceptar que de mèdias devenhan de tribunas liuras per l’expression d’ideologias mortifèras coma aquelas de l’extrèma dreita, que promòvon l’òdi e l’exclusion.
Se volèm sauvar la tolerància, la libertat e la democracia, devèm pas tolerar l’intolerància.
