by Sénher Capolier, Dònas e Sénhers membres dau Felibritge,
Coma fervents aparaires de la lenga occitana e de sa riquesa culturala, vos mandam aquesta letra dubèrta per exprimir nòstrei preocupacions prefondas. D’efiech, aprenèm que la mantenença de Provença dau Felibritge ven de sortir dau Forum d’Òc.
La rason que lo Felibritge provençau invòca per justificar aquela decision, valent a dire, «la defensa de la grafia mistralenca en Provença», nos pausa fòrça questions. E mai se lo respècte dei tradicions graficas es essenciau, es cruciau de questionar lei motivacions prefondas d’aquela retirada.
D’efiech, i a d’observaires que crenhon que la sortida dau Felibritge dau Forum d’Òc siá en realitat una manòbra orquestrada per de militants dau secessionisme lingüistic dintre l’occitan (valent a dire, per de gents que pretendon negar l’unitat de l’occitan). Aquela ipotèsi, se se verifica, seriá una menaça grèva per la vitalitat de nòstra lenga.
Lo Felibritge, coma institucion que garentís la promocion e la preservacion de la lenga occitana, deu esclarzir sa posicion sus aquela question. Es important de dissipar lei malentendres e de rassegurar lei parlants de nòstra lenga. Es necessari d’afirmar l’engatjament dau Felibrige per un apròchi inclusiu e respectuós de totei lei varietats de nòstra lenga.
Vos demandam donc de clarificar vòstra posicion sus lei questions seguentas.
1) Vos demandam d’emetre un comunicat oficiau per esclarzir vòstra posicion sus l’unitat de la lenga e sus lo problèma dau secessionisme lingüistic. Frederic Mistral e lei fondadors dau Felibritge defendián ben clarament l’unitat de la lenga occitana (o lenga d’òc o lenga provençala au sens larg). Vos demandam de reafirmar que lo secessionisme lingüistic es una posicion incompatibla amb la pensada unitària de Frederic Mistral e dau Felibritge.
2) Vos demandam de vos engatjar dins un dialòg constructiu amb lei diferents movements culturaus per fin de trobar una solucion que presèrve l’unitat de la lenga occitana. Cresèm que lo Forum d’Òc a totjorn respectat e valorizat lo Felibritge.
3) Vos demandam de reafirmar vòstre engatjament per la diversitat lingüistica, culturala e grafica dins l’occitan. Totei lei personas senadas respèctan la grafia classica e la grafia mistralenca, car totei doas illustran la glòria de nòstra lenga. Ramentam que la grafia classica èra la sola grafia dau provençau a l’Edat Mejana e fins au mitan dau sègle 16 e qu’a retrobat son usatge majoritari dins la literatura provençala dempuei leis ans 1950. Aquò es demostrat per leis estudis universitaris sus la literatura provençala. Militar per la dominacion de la grafia mistralenca e per la marginalizacion de la grafia classica, aquò es negar la cultura provençala.
L’avenir de nòstra lenga depend de la capacitat de superar lei divisions. L’avenir de nòstra lenga depend de la capacitat de trabalhar ensems per la promòure e per la transmetre ai generacions futuras.
En esperant vòstra respònsa constructiva, vos mandam, Sénher Capolier, Dònas e Sénher dau Felibritge, l’expression de nòstrei saludacions coralas.
Assemblada Occitana
