Un navèth feminicidi insuportable

Lo dimarç 4 de mai de 2021, la comuna de Mairinhac (Gasconha, banlèga bordalesa) es estada lo teatre d’un drama coma ne’n cutarén pas mei véder de nòstes jorns. Una hemna de 31 ans, mair de familha, es estada assesinada, cramada viva en plena carrèira après auger estada abatuda d’un còp de fusilh.  L’agressor es son companhon, multirecidivista coneishut daus servicis de polícia e sociaus per sa violéncia en particular envèrs sa hemna.

L’Assemblada Occitana desira tot premèir s’associar a la dolor e a la revòlta ressentidas per tot cadun devèrs aqueste acte inqualificable, inconcebable. Es desirosa tanben de rapelar son engatjament de cap a las valors de dignitat de cada èster uman, quau que sii son sèxe, sa religion, son origina sociala o etnica e sa condamnacion radicala, absoluda, de tota violéncia hèita aus mei fragils e vulnerables: hemnas, mainatges, personas atjadas o en situacion de handicap.

Mes aquesta cramança òrra ne diu pas dispensar d’agaitar las causas de cara, per tant qu’a las responsabilitats de l’estat francés dens aqueste afar. Los servicis sociaus, tanben coma los servicis de polícia, diven estar acarats dreits lurs responsabilitats e respónder dau fèit qu’un delinquent multirecidivista, d’una violéncia coneishuda envèrs son esposa, estussi estat deishat shens susvelhança, liure de l’aprochar a son deslaser, e la victima privada de tota traca de proteccion institucionala, en particular lo “telefòn dangèir grèu”, dispositiu legau dempuei 2014 dens l’estat francés per fin de protegir las personas menaçadas.

Per fin, la question culturala se dessenha au darrèir d’aquesta cramança, rapelant que l’estat francés, totjorn incapable d’assumir son passat colonialista, embarra sos ciutadans o abitants d’origina allogèna dens un dilèma shens responsa: se deishar assimilar “a la francesa” en renegant sa cultura e son patrimòni identitari, o estar desgitats e mespresats. L’afar en question relança lo debat sus aqueste punt caud de la politica francesa confrontada a las realitats dau monde de nòste temps.

Daissar un comentari

Vòstra adreça de messatjariá serà pas publicada.