by L’Assemblada Occitana sosten la campanha “Òc Pertot” per l’oficializacion e la dignificacion de l’occitan. Lançaa per lo movement occitanista Libertat, a per tòcha de faire pression sus los elegits e prevei, per aquò faire, un achamp mesadier, una peticion sus change.org e de campanhas d’afichatge e de pejasolets.
Sota l’eslogan “La lenga occitana fai partia de çò que siam”, Libertat a donat lo ton per un primier rassemblament que se debanarà lo 20 d’abril a partir de 15 oras sus la Plaça Clémenceau a Pau, per fin de debatre e portar d’idèas per la campanha.
Las revendicacions de la campanha correspòndon exactament a aquelas qu’a totjorn portat l’Assemblada Occitana:
- Oficialitat de la lenga occitana,
- Preséncia de l’occitan dins l’administracion e mejans necessaris per que chascun i se pòscha exprimir e èstre comprés.
- Ensenhament dins totes los cursus publics e privats de l’occitan e de l’istòria del territòri occitan.
- Proposicion d’educacion immersiva en occitan dins totes los establiments escolars.
- Expression entiera de l’occitan per las arts, la cultura, los mèdias….
- Quòtas de musica occitana sus las ondas de totas las ràdios qu’emeton sus lo territòri occitan.
- Quòtas d’articles en occitan dins la premsa locala.
- Creacion sus la TNT d’una television publica en occitan e d’un canal per Òc Tèle.
- Senhalizacion de las vilas, vilatges, charrieras, estraas… en occitan.
- Abrogacion de l’article 2 de la constitucion francesa, que reconeis mas que lo francés coma “lenga de la Republica”.
- Ratificacion de la Charta Europèa de las Lengas Regionalas o Minoritàrias.
De segur, l’Assemblada Occitana aficha una revendicacion maximalista que vai encara mai luenh que la simpla egalitat de tractament amb lo francés, vist que considèra normal que la lenga principala en Occitània siá l’occitan davant lo francés.
Ansin prepausam d’apondre las revendicacions e objectius seguents, perque volèm tenir còmpte de çò que se sap en sociolingüistica per revitalizar las lengas:
- Sostenir las familhas que fan la transmission orala de l’occitan, de generacion en generacion, qu’es un aspècte central per revitalizar una lenga.
- Encoratjar materialament la creacion de nuclèus de parlants actius de l’occitan, organizats en vesinanças o almens en malhums.
- Far de l’occitan una matèria obligatòria e valorizaa a l’escòla. Assumir un plan de recrutament e de formacion solida dels ensenhaires.
- Encoratjar l’usatge de l’occitan dins la vida professionala e economica.
- Aumentar progressivament las quòtas per que l’occitan venha la lenga majoritària dins los mèdias publics.
- Oficializar la lenga occitana en li garentissent un estatut prioritari sus lo territòri d’Occitània, abans las autras lengas.
- Encoratjar una senhalizacion que meta l’occitan abans las autras lengas, en primiera posicion.
- Sostenir un occitan estandard que faja referéncia, dins lo respècte dels grands dialèctes, per fin de resistir a la pression de las lengas dominantas. Un estandard es indispensable per garentir l’expansion foncionala d’una lenga.
Totun, consideram que las primieras revendicacions ja s’ameritan tot lo sosten de l’ensems del movement occitan, tant politic coma cultural.
Es pr’amor d’aquò que l’Assemblada Occitana sosten la campanha “Òc Pertot” de Libertat e apèla totas las organizacions occitanas a la sostenir tanben e a l’espandir de pertot en Occitània.
