by Lo celèbre cantador Dick Rivers, un occitan originari de Niça, ven de nos quitar. Exprimissèm lo nòstre respècte per la sieu òbra, la sieu personalitat fòrta e lo sieu grand succès popular.
Èra un òme dau nòstre país qu’assumissia emb fiertat lo sieu estacament au País Niçard e a la Còsta d’Azur, dins li sieus cançons e lu sieus libres.
Per trobar lo succès, malaürosament, si sentiguèt obligat de cantar en francés, la lenga dominanta, en luec de cantar en occitan. Totun es probable que conoissia l’occitan coma quasi toi lu niçards de la sieu generacion. Finda, tre lo començament de la sieu carriera, quitèt Niça e anèt a París per bastir la sieu estrategia dau succès. Es qu’a París que si trobavan li oportunitats de si far remarcar dins l’indústria dau disc, non pas a Niça. Dick Rivers, coma tant d’artistas e autors occitans, foguèt victima dau centralisme parisenc e francés qu’empedisse lo desvolopament de l’indústria culturala en Occitània.
L’Assemblada Occitana compatisse emb toi lu artistas, autors, musicians e trabalhadors que son originaris d’Occitània, dei Alps a l’Atlantic, e que s’exílian per trabalhar alhors. E mai se son obligats de cantar en francés e far carriera en defòra d’Occitània, aquò lèva ren lo fach que demòran occitans.
L’Assemblada Occitana revendica immediatament de poders autonòms dins li nòstri regions occitani. E a tèrme lucha per l’independéncia per Occitània per fin que d’artistas populars coma Dick Rivers tròben au país de condicions digni de carriera e de succès.
