by [Lo movement Assemblada Occitana sosten e redifusa aqueste tèxt de son vicepresident Matiàs Pepino.]
Las eleccions europèas son encara distantas, al minim en aparéncia, mas creo qu’es necessari d’iniciar un debat entre totas las fòrças occitanas (sens exclure aquelas de natura politica) que promòvon una idèa autonomista o independentista. Las eleccions europèas son las eleccions mai «occitanas qu’existisson», la nacion occitana s’estend en realitat sus 4 estats (Itàlia, França, Espanha e Mónegue) dont 3 son dins l’Union Europèa. E mai, lo format de las eleccions europèas permet una presentacion mai aisaa a las eleccions e de se presentar sens lo recuelh de signaturas (qu’en Itàlia e en Catalonha risca d’èsser una quimèra insuperabla, en considerant los nombres escàs de residents dins las zònas occitanas) mas amb un simbòl present dins lo parlament europèu. Una lista unificaa a las eleccions europèas, amb lo simbòl unic d’una realitat autonomista e federalista, seriá una realitat mai unica qu’una rara en Euròpa!
Es necessari d’eschampar totas las divisions qu’an empedit fins aüra a l’occitanisme politic de s’afirmar coma movement politic credible e popular. Es ora d’assajar! Las condicions politicas (amb lo chauvinisme crescut de pertot, coma es demostrat per las recentas eleccions politicas en Itàlia e en França e coma los sondatges o mòstran en Espanha amb Vox) dison que se restam devesits, riscam de desaparéisser! Siam una de las nacions mai grandas del Mond, mas tanben una d’aquelas ont la lenga e la cultura s’esvanisson rapidament, englobaas per la cultura «globala» que fai semblant de protegir las culturas minoritàrias mas que las relèga al folclòre e que se convertís en una cultura de la mancha: ben, per tot aquò, nos convencèm fermament que chal reagir!
Unischam-nos, non pas dins una lista qu’anulle las diversitats e que finischa que siá solament electorala e d’elèit sens lo seguiment popular, mas dins un manifèst programatic simple, amb qualques ponchs clars e unitaris, sus çò que totes ne siam d’acòrdi! E sio aquí!
Qui nos vòl seguir dins aquò? Aquesta iniciativa es nascua dins una discussion entre quauques membres de l’Assemblada Occitana Valadas, en autonomia de la maison maire, e s’es estendua a totas las realitats occitanistas dins las Valadas Occitanas d’Itàlia, en Occitània Granda e en Val d’Aran!
Matiàs Pepino
