by Lo 26 de setembre moriguèt l’ancian chap de l’estat francés Jaume Chirac. Se’n seguiguèt una jornada d’omenatge e un enterrament digne d’un òme d’estat, emb las onors militaras e la preséncia de las delegacions internacionalas.
L’Assemblada Occitana refusa de se jónher au vam d’omenatges gratificants que Jaume Chirac n’a fach l’objècte. Perque es totjorn demorat un adversari de las valors que defendèm.
E mai se portava un patronim tipicament occitan e se n’assumissiá l’origina —aquela de “la lenga d’òc, […] daus trobadors, donc […] de la poesia”, çò diguèt—, Jaume Chirac a pas jamai fach res per la lenga e la cultura occitanas.
D’efiech, Jaume Chirac se disiá a l’encòp un sincèr defensor de las culturas dau Mond, mas de fach, èra un adversari acharnassit de las lengas minoritàrias de l’estat francés. Sota lo sieu segond mandat (2002-2007), lo nombre de doberturas de pòsts de professors d’“occitan-lenga d’òc” au CAPES baissèt radicalament, en passant de vint per an a solament quatre uei.
Pertochant la soá passion per las “arts primieras”, se concretizèt per la dobertura a París en 2006 d’un musèu qu’expausa daus tresaurs artistics africans raubats après daus pilhatges coloniaus. Mentre que donava dau mejans enòrmes a las “arts primieras”, laissava morir sa pròpria cultura occitana.
Quò es segur que Jaume Chirac aguèt lo coratge de refusar la guèrra en Iraq en 2003. Pasmens se pòt pas desmembrar qu’èra un òme politic sens escrupul, prèst a totas las manòbras e manipulacions per conquistar lo poder. Las soás rets escuras e los nombrós afaires de corrupcion faguèron de Jaume Chirac un president vermenós de las practicas mafiosas.
- Destornament daus fons de las caissas de l’estampariá Sempap
- Emplecs fictius a la Comuna de París
- Destornament de fons en marge de l’atribucion de merchats publics de l’Ofici HLM de la vila de París
- Comissions ocultas en marge daus merchats publics daus licèus de l’Illa de França
- Finançament oculte dau partit politic RPR emb los portaires de maletas
- Bilhets d’avion d’Euralair
- Despensas de noiridura somptuàrias
- Françafrica e los milions esconduts daus rets Foccart
Se pòdon pas desmembrar tanpauc las politicas repressivas e antisocialas qu’an tachat los seus mandats tant de president coma de primier ministre.
- Supression de l’impòst sus la fortuna (1986)
- Mòrt de Malik Oussekine, victima de violéncias policieras a París (1986)
- Chaple de la bauma d’Uvea en Canaquia (Nuòva Caledònia, 1988)
- Discors racista d’Orleans (“lo bruch e l’odor”, 1991)
- Represa daus assais nuclears en Polinesia (1995)
- Plan Jupèr que menaçava la justícia sociala (1995)
- Expulsion daus sens-papiers a la Glèisa Saint-Bernard de París (1996)
- Reforma de las retiradas (2003)
- Bilanç financier catastrofic emb explosion dau deute public
Enfin, l’Assemblada Occitana deplora que lo tractament mediatic que se fai a l’entorn de la mòrt de Jaume Chirac aja ocultat per un temps lo subjècte ben mai grèu de la catastròfa ecologica provocada per l’incendi de l’usina Lubrizol a Roan.
