by Lo dissande 5 d’octòbre passat se tenguèc al Cementèri Montparnasse de París una manifestacion del movement Femen. L’accion e la simbolica èran tras que fòrtas: sota l’eslogan “Aplant als feminicidis!”, un centenat de militantas traversavan en silenci lo cementèri, maquilhaas de zòmbis amb la pèl e los pels recobèrts d’argela, per ben faire comprene que las femnas son “mai escotaas mòrtas que vivas”. Chascuna portava una pancarta negra en forma de lausa que i figuravan los noms de femnas tuaas per sos conjonchs o èx-companhs. Sus los busts èran marcats d’eslogans coma “Volio pas morir”, “L’ai quitat, m’a tuaa” o “Me prendràn al seriós quora serai mòrta”.
L’objècte de la manifestacion èra clar: denonciar los feminicidis e reclamar al govèrn de l’estat francés “una mobilizacion mai fòrta”. D’efiech, lo nombre de feminicidis dins l’ensems de l’estat francés demenís pas. Èra de 121 en 2018, e aqueste an a ja agantat la chifra de 120 femnas tuaas. La màger part dels feminicidis se debanan al domicili conjugal.
Occitània non es esparnhaa per aquela calamitat. La preséncia tròp nombrosa de tals cas de feminicidis repertoriats aqueste an dins las divèrsas regions d’Occitània mòstra que la societat occitana es encara tròp banhaa dins la violéncia masclista e que fai mestier un prefond chambiament de mentalitat. Aquò implica pereu un chambiament radical d’actituds, tant de la populacion coma dels poers publics locals. Las menaças e agressions las chal prene al seriós sistematicament e las chal sancionar sus lo còp.
Los de l’Assemblada Occitana, sostenèm las accions dels movements feministas, que son acòrdi amb nòstras valors qu’estimam non negociablas: la lucha per lo feminisme, l’egalitat dels sèxes e una societat occitana sens masclisme. Dins aquela logica, sostenèm totas las activistas feministas e denonciam las inegalitats entre los sèxes e tot cò que lai contribuís. Combatèm amb vigor e sens respiech tota posicion misogina e degradanta, tota justificacion e incitacion a las agressions, al secutament e a las violéncias contra las femnas (vejatz lo dorsier sus la condicion femenina, 18.12.2017).
Aqueste combat deu passar per l’educacion escolara e familiala, l’instruccion, la politica, la representacion e l’exercici dels poers, las religions ensenhaas, lo refús categoric del patriarcat, la liberacion de la paraula de las femnas, lor accès egalitari a totes los mecanismes de la societat, la paritat de pertot e bèlcòp d’autras chausas encara… Es un combat de chasque jorn.
