Rebellions a Marselha, Ais e Bordèu còntra lo centralisme de París
L’Assemblada Occitana sosten per principi lei mesuras sanitàrias còntra lo covid-19, mai denóncia la maniera brutala e centralista de leis impausar dempuei París sens dialogar amb leis elegits e lei professionaus d’Occitània. Avèm subit aqueu centralisme, per exemple, dins lei metropòlis occitanas de Marselha, Ais de Provença e Bordèu.
Aquesta setmana, lei vilas de Marselha e Ais de Provença subisson de barraduras autoritàrias dei bars, dei restaurants e dei salas d’espòrt, per decision brutala dau ministre de la santat a París, sens la mendre concertacion amb lei professionaus e leis elegits. Pasmens la zòna d’Ais-Marselha a fach baissar lei contaminacions aquestei darriers jorns gràcias a seis professionaus, a seis elegits e a sei còlas medicalas que se mobilizan sens relambi.
A Bordèu, en començament de setmana passada, de bars foguèron barrats administrativament per simpla decision de la prefècta, sens concertacion amb lei professionaus e leis elegits. Pasmens la Nòva Aquitània es una region pioniera dins la resisténcia a la pandemia dempuei la primiera onda.
L’Assemblada Occitana es au costat deis abitants d’Occitània quand se rebèllan còntra lei metòdes centralistas de l’estat francés.
