by Mai de quatre ans son passats dempuei que l’Assemblada Occitana publiquèt son dorsier sus la crisi de l’occitanisme. Daus obratges e de las conferéncias s’organizèron sus aqueste tèma. Constatam, dempuei, que la situacion a gaire chamjat e que la crisi es enquèra prigonda.
L’occitanisme politic es marginau e gaire representat dins la populacion occitana. Dins lo païsatge electorau, non i a gran de partit independentista occitan ambiciós, solidament implantat e susceptible de devenir una força politica influenta.
Lo Partit Occitan (PÒC) demòra la formacion politica occitana mai solida, mas son programa es pas independentista. D’autras formacions an abandonat lo nacionalisme occitan au profiech d’un regionalisme lengadocian, quite de pachejar emb daus partits que promòvon l’ancioccitanisme.
L’ensemble daus movements politics occitans penan per rassemblar e demòran enquèra aitant devesits e jos un format gropusculari. Lor activitat febla traís un envielhiment e una passivitat de la basa militanta.
Dins aquela situacion persistenta de crisi, l’occitanisme deu mostrar de l’imaginacion per contornar los problèmas insolubles que l’empachan de se desvolopar. I a de las pistas possiblas per anar dins aqueu sens.
Las organizacions e los militants occitans son tròp devesits. Cerchar de los rassemblar per formar un movement de massa es una illusion e una pèrda de temps. Lo consens minim sufís pas per mobilizar los occitanistas darrier un mesme projècte politic larg e transcendentau.
- En plaça de cerchar de reünir totas las organizacions dins una coalicion minimalista, vau mai favorizar las cooperacions crosadas e pontualas entre movements occitans. Aquò se fai dins lo movement culturau e fonciona a meravilha.
- En plaça de cerchar de rassemblar los occitans ja conscientizats, vau mai privilegiar l’eschamge emb lo pòble qu’es en defòra dau movement e non conscient de son occitanitat.
La conscientizacion dau pòble d’Occitània es la condicion sine qua non per esperar una futura mobilizacion populara e considerar un combat politic, per fin de rompre las chadenas de nòstra alienacion nacionala.
