22.05.2024

Non a la recuperacion imperialista de la causa occitana!

L’Assemblada Occitana s’inscriu dins l’occitanisme maximalista que cèrca de restaurar la dignitat nacionala occitana en luchant essencialament còntra l’ideologia jacobina, caracteristica dau nacionalisme francés d’expansion.

Per tant, l’Assemblada Occitana entende pas sostenir li autri poténcias imperialisti que si pòdon opauar a França, especialament a l’internacionau.

Dins lu país de l’Africa dicha «francofòna», França es en pèrda de velocitat fàcia a l’influéncia creissenta de Russia e de China. Lo reget de París per li populacions de la màger part dei país africans es la consequéncia logica de decennis de Françafrica: una politica neocoloniala tacada de manipulacions politiqui safranoï, d’esplecha economica e de pilhatge dei ressorsas naturali.

Se la rompedura de la tutèla parisenca es en principi una excellenta caua, si podèm pas regaudir que si faga au prètz de la somission a d’autres interès imperialistas que repilhan la mesma politica neocoloniala sota una autra bandiera. Lu còps d’estat en Mali e en Burkina Faso an installat de dictaturas militari alinhadi sus Moscòu e qu’esitan pas per s’apontelar sus de grops paramilitars coma Wagner que semenan la terror au près dei populacions locali.

Sus d’autres frònts, coma en Sud-Caucàs, l’estat francés mena una lucha d’influéncia còntra lu imperialismes turc, azèri e rus. Li recenti tensions diplomatiqui entre França e Azerbaitjan an menat lo regim de Bakó a sostenir lu movements de lucha còntra lo nacionalisme territoriau francés, especialament lu movements còrs, polinesians e canacs. La dictatura petroliera azerbaitjanesa mancarà pas de s’interessar au movement occitan se per cas reüssisse un jorn a devenir influent dins la societat occitana.

E mai s’avèm en comun de luchar còntra l’imperialisme francés, refusam tota logica campista que vòu que «lu enemics dei nòstres enemics sian lu nòstres amics». Regetam tota recuperacion dau nòstre combat per de regims dictatoriaus e criminaus.

Combatèm, de còps coma elu, l’imperialisme francés, mas pas per li mesmi rasons.