21.07.2024

Jòcs Olimpics de París: imperialisme francés e desmesura

Dau 26 de julhet a l’11 d’aost de 2024 se debanaràn lei Jòcs Olimpics de París. L’Assemblada Occitana entend de denonciar la molonada d’escàndols que mascaran aquela manifestacion esportiva, e especialament leis escàndols seguents:

  • S’utiliza nòstre territòri occitan per un trajècte de flama olimpica qu’es plen de simbòls chauvinistas tricolors francés, e sens mostrar lo mendre simbòl deis anèus olimpics! Aquò o avèm pogut constatar sus plaça. Es una operacion de borratge de cran per refortir lo chauvinisme francés e per alienar lo pòble occitan.
  • S’utiliza l’argent public (doncas tanben deis occitans) per desvolopar la Region Parisenca, e non pas Occitània.
  • I a de condicions de trabalh escandalosas: ne sofrisson un molon trabalhadors en situacion irregulara. Que son esplechats e somés a l’omertà per un desenat de sostractants e d’entrepresas famosas dau BTP, au servici de la Societat de Liurason deis Obratges Olimpics (Solideo). Aqueleis entrepresas an recors au cantatge còntra lei trabalhadors senspapiers per li far acceptar de trabalhar clandestinament e sens garentidas socialas ai pòsts mai dangierós.
  • S’utiliza excessivament 50 000 volontaris benevòls que sei missions s’emparentan clarament a de trabalh escondut. Seràn somés a d’amplituds oràrias similaras a un trabalh salariat, sens èstre alotjats ni percebre de salari, mentre que lei publicitaris elei seràn remunerats.
  • Se desplaça de fòrça de miliers de precaris e de senssosta francillians. Se fòrabandís leis estudiants dei 3000 alotjaments vesins dei sits olimpics: seis alotjaments son requisicionats d’un biais opac per i aculhir lo personau de l’estat e leis agents de seguretat.
  • Lo budget faraonic de l’organizacion d’aquelei jòcs es sosestimat segon la Cort dei Còmptes, e se pren de decisions opacas dins lo finançament e lei mercats pachats. I a d’enquistas que se menan sus de cas possibles de desvirament de fons publics e de conflictes d’interès.
  • Lei prètz son exorbitants quand cau pagar lei títols de transpòrt e lei plaças deis espròvas olimpicas. Lei Jòcs de París 2024 seràn lei mai cars de l’istòria e restaràn inaccessibles a la màger part deis espectators.

Lo percors dau relèu de la flama olimpica travèrsa totei lei vilas màgers d’Occitània, especialament Marselha, ont s’es format un collectiu anti-JO, portat per de valors democraticas e environamentalas. Per remembrança, Marselha aculhirà lei disciplinas de fotbòl e de vela dei JO.

L’Assemblada Occitana denóncia enfin la polemica suscitada per la participacion de la cantaira Aya Nakamura a la ceremònia de dobertura. Qu’es una polemica purament racista, qu’es l’extrèma drecha que l’empura, amb l’objectiu doble de destillar l’òdi entre la populacion e de desvirar l’opinion publica deis escàndols vertadiers tocant l’organizacion dei Jòcs.