by L’Assemblada Occitana s’opausa categoricament al projècte controvertit de l’autoestrada A69 en Lengadòc.
En general, sostenèm lo desvolopament sòcioeconomic d’Occitània a condicion que trebole pas grèvament l’environament e la biodiversitat, e que pòrte profièch realament a la populacion locala. Constatam que dins lo cas present, aquelas doas condicions son pas emplidas.
Per remembrança, l’A69 es un projècte d’autoestrada de 53 km que deu reliar Castras a Vrufuèlh, près de Tolosa. Sa construccion comencèt en març de 2023. Se prevei de la dobrir en 2025 e s’estima que costarà 500 milions d’èuros.
Lo grop Pèire Fabre, primièr emplegaire de Tarn, es lo principal promotor del projècte. E mai n’es a l’origina. Sosten que l’autoestrada favorizariá la competitivitat e l’atractivitat del territòri. En fach, l’autoestrada permetriá al grop de se desvolopar en melhorant l’accès al sieu sit, tant per los emplegats coma per los camions de mèrça.
Lo grop Fabre faguèt de lobbyisme al près dels decideires politics e obtenguèt que lo projècte foguèsse declarat d’utilitat publica pels diferents govèrns franceses jos Sarkozy, Hollande e Macron. La concession foguèt acordada a la societat Atosca que lo grop Fabre n’es accionari. Atosca assegurarà la construccion de l’autoestrada e l’esplecha del peatge.
Los opausants a l’A69 temptèron sens succès d’obténer la suspension de las òbras puèi l’abandon del projècte. Entre eles figuran d’associacions environamentalas, d’organismes scientifics, de collectius, de personalitats internacionalas e mai d’instituts coma l’Autoritat Environamentala e lo Conselh Nacional de la Proteccion de la Natura. En mai d’aquò, diferents sondatges revèlan que mai del 60% de la populacion del territòri pertocat es favorabla a l’abandon del projècte.
Se repròchan especialament los ponches seguents:
- L’impacte ecologic del projècte lo rend incompatible amb los objectius de preservacion de la biodiversitat e de reduccion de las emissions de gas amb efièch de sèrra.
- Los mejans de compensasion prepausats per Atosca mancan de realisme: los arbres joves plantats per compensacion an patit un taus recòrd de mortalitat.
- L’analisi sòcioeconomica del projècte sofrís de mancanças seriosas: se basa sus de donadas de trafec obsolètas. En mai d’aquò, s’estima que l’interès sòcioeconomic compensa pas los «damatges» importants a l’environament.
- Lo montatge juridic e financièr faguèt l’objècte d’una enquista mentre que d’unes an fach sa denóncia contra Atosca per sa gestion de las aigas pluvialas e sosterranhas dins las òbras en cors.
- Lo prètz de la futura autoestrada es proïbitiu, d’aitan mai qu’aquela remplaçarà las actualas vias rapidas e gratuitas que contornejan las vilas de Puèglaurenç e Soal.
En mai d’aquò, existís un projècte alternatiu que nos pareis mai pertinent: transformar l’estrada nacionala 126 (RN 126) en «veloestrada nacionala» e refortir los transpòrts collectius connectats.
Enfin, l’Assemblada Occitana denóncia la repression dels manifestants pacifics depart de las autoritats de l’estat francés. Lo prefècte de Tarn a enebit tota manifestacion jol pretèxt fallaciós qu’entre los participants i auriá de centenats d’elements radicals, dont de black blocks.
Pièger, las fòrças de l’òrdre exercisson dempuèi de meses una obstacle escandalós a la libertat de la premsa que vòl cobrir las mobilizacions dels opausants al projècte. Aquela situacion, lo raportaire especial de l’ONU, Michel Forst, l’a denonciada.
Fòto: BlueBreezeWiki
