by Per las eleccions europèas, nosautres de l’Assemblada Occitana sostenèm pas de lista particulara dins los estats italian e espanhòl; remarcam que i a dins l’estat francés de candidats occitanistas serioses sus la lista Euròpa-Territòris-Ecologia.
Nòstres collègas del Partit Occitan an de candidats credibles sus la lista Euròpa-Territòris-Ecologia, qu’es dirigida per Guillaume Lacroix e lo Partit Radicial d’Esquèrra (PRG). Totun nos auriá agradat qu’aquela lista faguèsse de proposicions mai audaciosas per oficializar la lenga occitana e per donar una autonomia a Occitània.
D’autras listas de l’estat francés pretendon promòure las lengas dichas «regionalas» mas mancan de seriós e de sinceritat, e donc, las podèm pas sosténer (listas Governatori, Lassala, Wehrling, etc.).
Del costat de l’estat italian, nosautres de l’Assemblada Occitana preparèrem un long dialòg politic amb l’Union Valdostana (Union Valdôtaine) per associar un canditat occitanista a la lista d’aquel movement, mas las discussions arribèron pas a ges de resultat e, donc, per nosautres es impossible de sosténer cap de lista.
Del costat de l’estat espanhòl, vesèm pas cap de lista amb un engatjament occitanista visible. Certanas listas sostengudas per los movements independentistas occitans-araneses e catalans semblan las mai interessantas.
En tot cas, apelam los elegeires a barrar la via a totas las listas d’extrèma drecha. Es important que los elegits europèus defendan los pòbles minorizats, la justícia sociala, l’environament e la patz en Euròpa.
