Solidaritat amb los Alps occitans après lo desastre

Comunicat · 10.10.2020

Mas que quatre jorns après l’aigat desastrós qu’a frapat las vals occitans alpencas —Tànar, Vermenanha, Ges, Ròia, Tiniá, Vesubiá—, los mèdias italians ja eissublian l’eveniment.

Dementre, senhalam, malgrat lo vam valorós dels volontaris que lor disèm nòstres GRANDMERCÉS, coma se pòt pas encara rejónher completament la zòna de Limon. Las estacions d’esquí son seriosament damatjaas.

Nos sentèm lo dever de comunicar coma la Val de Ròia, que lo president francés Macron l’a vesitaa, aüra per aüra se pòt rejónher solament amb los elicoptèrs. La television francesa, France Info, evòca la possibilitat d’evacuar la Val de Ròia e deschaena la protèsta legitima dels tendascs.

Las autoritats francesas e las italianas, ensems, son a temptar de restablir, almens per lo transpòrt de las mèrças, la linha ferroviària de Limon a Tenda, las primieras ajuas per ferrovia arribaràn a Vievola… Desiram que la ferrovia se refortischa!

Nos sentèm lo dever de denonciar l’abséncia del govèrn italian dins las valadas. Rendèm nòta de la sitacion en Val Ges, ont l’estraa delai lo lac de roïnas existís pas pus, e ansin risca de damatjar de maniera definitiva l’economia toristica de la valada… 

Pereu la sitacion a Ormea es fòrça grèva. Lo vilatge es encara dins la baudra. Una intervencion immediata fa mestier.

ASSEMBLADA OCCITANA
Ais de Provença
www.assemblada.org
info@assemblada.org

Daissar un comentari

Vòstra adreça de messatjariá serà pas publicada. Los camps obligatòris son indicats amb *