L’occitanisme politic es en duelh!

Despí lo principi de l’annada 2022, l’occitanisme politic planhe lo duelh en seguida dei pèrdas successivi de tres personalitats de valor: Xavier Bada, Pèire Boissièra e Geli Grande.

Xavier Bada i Amatller èra una personalitat politica catalana importanta: foguèt conselhier nacionau dau partit catalanista Convergéncia Democratica de Catalonha (CDC) e deputat au Parlament de Catalonha sota l’etiqueta de Convergéncia e Union (CIU). S’especializava dins l’agricultura: presidiguèt manti cooperativas agricòli, collaborèt dins la promocion de la Federacion dei Cooperativas Agricòli de Catalonha e recebèt l’Òrdre Civil dau Meriti Agricòla dau Ministèri de l’Agricultura. Xavier Bada èra un occitanista convencut. Foguèt membre d’onor dau Partit de la Nacion Occitana (PNO) e participèt au govèrn provisòri de la Republica Federala Occitana (RFÒC) en qualitat de ministre de la justícia e d’ambaissador d’Occitània en Catalonha.

Pèire Boissièra èra tot plen engatjat dins l’activisme occitan, tant culturau coma politic. Au nivèu culturau, foguèt collector, contaire e autor-compositor, especialament de cant tradicionau occitan qu’ensenhava. Foguèt tanben director de l’Escòla Occitana d’Estiu e s’especializèt dins la toponimia, disciplina dont organizava de conferéncias dins l’encastre de la Quinzena Occitana d’Òlt e Garona. Sus lo plan politic, èra membre dau Partit Occitan e venguèt cònsol màger de la Cauçada pi adjonch dau cònsol màger a Gavaudun.

Geli Grande èra eissit d’una familha de pènnegres tunisians d’origina italiana. Arribat a sièis ans en Occitània, en Agenés, emparèt la lenga dau país e adoptèt la cultura nòstra que ne venguèt un defensor apassionat. Intrèt dins l’activisme politic occitan gràcias ai sieus rescòntres emb divèrsi personalitats coma Jaume Ressaire e sobretot Francés Fontan, pensaire màger de l’occitanisme politic e fondador dau futur Partit de la Nacion Occitana (PNO). Militant infatigable, participèt a toti li batèstas de l’occitanisme politic fins a devenir còpresident dau PNO. Èra tanben actiu au nivèu culturau, especialament dins lu domenis de la literatura, de la toponimia e, en generau, de l’onomastica. Faïa de poesia e venia tot bèu just de publicar un recuelh de poèmas, Punta de roge. Enfin, èra un apassionat de rugbi.

L’Assemblada Occitana planhe lo duelh ai familhas e ai amics d’aquelu tres grands occitanistas.

Daissar un comentari

Vòstra adreça de messatjariá serà pas publicada.