Primier torn deis eleccions regionalas de 2021: lei leiçons de retenir

Lo dimenge 20 de junh passat s’es tengut lo primier torn deis eleccions regionalas de 2021. Aquelei votacions an vist la participacion de doas listas occitanistas autonòmas: “Òc per Provença” (en Provença-Aups-Còsta d’Azur) e “Bastir Occitanie” (dins la Region de Tolosa dicha abusivament “region Occitània”).

“Òc per Provença” es arribat a un 2,18% (25 209 votz). Es un resultat modèst mai fòrça onorable per un primier còp. L’implantacion regionala dei militants, e mai lo discors concret e l’union deis occitanistas de sensibilitats diferentas an creat una dinamica positiva. “Òc per Provença” es una iniciativa dau Partit Occitan qu’a recebut lo sosten de l’Assemblada Occitana. L’occitanisme dobèrt qu’aquela lista lo promòu a permés de conquistar una existéncia electorala e d’obtenir fòrça mai de legitimitat democratica que non pas lei lobbys pseudoprovençalistas (coma lo Collectiu Provença).

“Bastir Occitanie”, dins la Region de Tolosa, obten un 0,76% (11 510 votz). L’occitanisme e lo catalanisme èran devesits dins aquesta region. Sola una part deis occitanistas sostenguèron “Bastir Occitanie”. L’autra part deis occitanistas (Partit Occitan) e la majoritat dei catalanistas (ÈRC, Sí al País Català) sostenguèron la lista EELV que pasmens disiá ren dins sa profession de fe oficiala en favor dei lengas occitana e catalana.

En Auvèrnhe-Ròse-Aups, lo Partit Occitan (PRS) sostenguèt la lista de senèstra de Najat Vallaud-Belkacem. Mai aquela lista, tanpauc, disiá ren dins sa profession de fe oficiala en favor de la lenga occitana. En Nòva Aquitània e en Centre-Vau de Léger, i aviá pas de candidatura occitanista coneguda.

Lei resultats d’aqueleis eleccions nos donan d’autreis ensenhaments:

  • Lo percentatge d’“Òc per Provença” es superior a aqueu de “Bastir Occitanie”. Demòstra que, contràriament a çò que pensan certanei faus occitanistas partisans d’una Occitània reducha a la Region de Tolosa, l’occitanisme politic a beneficiat d’una unitat e d’una vitalitat mai grandas en Provença que non pas en Lengadòc.
  • Lo taus d’abstencion a despassat lo 65% dins lei regions occitanas; aquò demòstra una desmobilizacion de l’electorat e una pèrda de fisança a respècte dei partits politics parisencs.
  • L’RN a fach de percentatges mens importants que prevists, mai es en primiera posicion en Provença ont lo pes electorau de l’ultradrecha francesa es preocupant (RN, sobeiranistas, identitaris e tendéncia drechista d’LR).

Es necite de desvolopar un movement occitanista fòrt amb una consciéncia fòrta de la cultura occitana (per exemple: la cultura provençala, niçarda, aupenca, etc.): que serà un bòn remèdi còntra l’extrèma drecha e còntra la manca d’estrambòrd dei ciutadans en politica.

Daissar un comentari

Vòstra adreça de messatjariá serà pas publicada.