by L’Assemblada Nacionala Occitana exprimís son dòl davant lo decès del poèta, pensador e editor Bernat Lesfargas (1924-2018).
Originari de Peiregòrd, en avent viscut longtemps a Lion, Bernat Lesfargas nos daissa una òbra rica e generosa qu’assòcia l’engatjament autonomista occitan, lo federalisme europèu e las valors de progrès.
Foguèt un des pionièrs de l’Institut d’Estudis Occitans tre sa fondacion en 1945. Tenguèt un ròtle central dins las revistas literàrias Les Cahiers du Triton Bleu e Jorn. Fondèt una librariá a Lion. Puèi animèt las edicions Fédérop, basadas a Lion puèi en Peiregòrd.
L’òbra de Bernat Lesfargas es considerabla per son amplitud e sa generositat. Concília la literarura, la consciéncia politica, l’engatjament per Occitània amb la dobertura federalista sus lo Mond. En mai de sos escriches personals, Bernat Lesfargas, amb Fédérop, a fach conéisser d’autres escrivans d’excellenta qualitat e mai d’autres pensadors, en occitan, en catalan, en espanhòl e dins d’autras lengas. Tanben a publicat de libres sus lo federalisme e las minoritats nacionalas.
Es un grand òme que nos quita: l’Assemblada Nacionala Occitana lo saluda respectuosament, planh lo dòl a sa familha e sos amics e desira que son eiretatge se conesca melhor.
