by L’Assemblada Nacionala Occitana es en dòu per lo decès de Jòrgi Gròs (1922-2018). Lo grand escrivan e pedagòg laissa un voide dins nòstra literatura occitana e dins nòstre païsatge intellectuau.
Son òbra literària es ancorada dins la vila de Nimes e, a l’encòp, es connectada amb lei movements dau Mond. Consistís en una colleccion de romans, de còntes, de novèlas e poesias que marcan definitivament lei letras occitanas contemporanèas.
En mai de la literatura, Jòrgi Gròs a publicat de reflexions pedagogicas en acòrdi amb lei metòdes avantgardistas de Celestin Freinet. Es gràcias a Jòrgi Gròs, entretant, que l’ensenhament de la lenga occitana s’es desvolopat de tecnicas modèrnas e qu’a beneficiat a fòrça enfants.
Lei trabalhs de l’autor nimesenc, escrichs en provençau e en grafia classica, ocupan una plaça fòrça importanta dins la dignificacion de la cultura de Provença.
Planhèm lo dòu a tota la familha e a totei leis amics de Jòrgi Gròs. Avèm una pensada especiala per sa filha Martina Gròs qu’es sòcia de l’Assemblada Nacionala Occitana.
Esperam que lei nombrós manuscrits inedits dau grand escrivan nimesenc se publicaràn lèu-lèu per lo benefici de la cultura d’òc e per l’edificacion de sei legeires.
