by Lo president de Provença-Alps-Còsta d’Azur, Renaud Muselier, vòl donar a aquesta region lo nom de “Sud” (o “Sud-Provença-Alps-Còsta d’Azur”). L’a enregistrat a l’INPI coma tèrme de comunicacion mas es pas un nom oficial. Sénher Muselier crei que seriá un bòn mejan d’evitar l’afrosa sigla “PACA”.
L’Assemblada Nacionala Occitana pensa, efectivament, que chal evitar la sigla “PACA” perque es inexpressiva e escond la personalitat istorica de nòstra region.
Totun lo nom de “Sud” es pas una melhora solucion perque es tanben un nom artificial, sens ges de prefondor istorica e culturala.
En mai d’aquò, en Provença-Alps-Còsta d’Azur, nos definissèm pas coma lo “Sud” de quicòm mai. Nos sentèm prefondament provençals, niçards e alpencs. Fasèm partia de la granda Occitània.
L’Assemblada Nacionala Occitana (ANÒC) revendica donc un chambiament radical dins la gestion de las regions. Volèm:
- Un nom de region que respècte nòstra istòria e nòstra personalitat culturala coma alpencs, niçards e provençals.
- Un abandon de la reforma territoriala de Manuel Valls e Francés Hollande, qu’es autoritària e artificiala.
- Una retalhaa regionala que respècte las realitats istoricas e culturalas, en concertacion amb las populacions.
- L’atribucion del nom d’Occcitània, non pas a la region de Tolosa, mas a tot l’espaci de la cultura occitana que s’estend dels Alps a l’Atlantic e del Massís Central als Pirenèus.
- L’afirmacion clara que Provença-Alps-Còsta d’Azur es una partia integranta d’Occitània.
- Un plan de desvolopament de la lenga de Provença-Alps-Còsta d’Azur, qu’es l’occitan (dins lo respècte de sas varietats: niçard, vivaroalpenc e provençal al sens estrech).
- Una aliança de las regions occitanas per bastir una granda Occitània autonòma, amb lo drech d’autodeterminacion.
