L’occitan, una lenga totjorn mai en dangier!
Comunicat · 07.12.2017
Aqueste auton dau 2017, doi eveniments en doi luecs distints d’Occitània tota nos an fach remembrar que la situacion de l’occitan dins lu mèdias e lo sistèma d’ensenhament de l’Estat francés demòra fòrça precària e li cauas non si melhoran.
A Tolosa, lo 8 de novembre passat, un desenau d’associacions e movements occitans, formant lo Collectiu Occitan, s’èran amassats davant dau Capitòli per revendicar una mai granda plaça a la lenga occitana sus l’antena regionala de France 3 e denonciar l’anullacion dei contractes ajudats necessaris au foncionament dei establiments escolars occitans (Calandretas). S’es lançada a aquela escasença la campanha “Volèm l’occitan cada jorn a la television”. Dins aquela dralha, lo Collectiu Occitan organizarà una nòva manifestacion a Tolosa lo 3 de febrier dau 2018.
A Niça, l’ensenhament de l’occitan niçard es grandament menaçat despí que si prevé la barradura de la licéncia d’occitan a l’Universitat de Niça en rason d’una manca d’inscripcions sufisenti. La nòva cadena de television Youtube en niçard, “Cultura Viva”, lança un apèl a la resisténcia per sauvar l’ensenhament de l’occitan a l’Universitat de Niça.
Coma o precisan lu sieus estatuts, l’Assemblada Nacionala Occitana milita per la promocion e lo desvolopament de la cultura e de la lenga occitana e denóncia emb vigor cada temptativa de l’Estat francés d’entravar lo sieu ensenhament.
La vision de l’ANÒC pertocant la lenga es maximalista: volèm un estatut de lenga oficiala, la generalizacion dau sieu ensenhament dins toi lu establiments escolars d’Occitània e a toi lu nivèus e la sieu preséncia constanta dins lu mèdias e l’administracion.
***
Units per Occitània
***
ASSEMBLADA NACIONALA OCCITANA
13090 AIS DE PROVENÇA
www.assemblada.org
info@assemblada.org
+33 6 46 62 74 93
