by L’Assemblada Nacionala Occitana càmbia de nom e s’apèla desenant l’Assemblada Occitana.
Lo nòstre nom novèu, l’Assemblada Occitana, vòu èstre pus simple, pus dinamic, pus clar e de bòn reconóisser.
Arboram un lògo novèu qu’illustra la nòstra esperança dins lo futur.
Lo nòstre movement perseguisse l’objectiu d’orígina: volèm la libertat dau pòble occitan e de tot país d’Occitània, de l’Atlantic ai Alps.
Embau nom novèu, cambiam d’estrategia perque tenèm d’escomesas nòvi per lo 2019 e lu ans 2020.
Despí la nòstra fondacion, en lo 2015, siam un movement fraire de l’Assemblada Nacionala Catalana (ANC). Volèm la libertat d’Occitània coma elu vòlon la libertat de Catalonha. Mas Catalonha subisse una repression dura de l’estat espanhòu. Lo vam catalan non si transferisse pron dins la populacion occitana. E lo movement occitanista, aüra, es en cèrca d’impuls e de novelum.
Doncas, l’Assemblada Occitana concentrarà lu sieus esfòrç per revelhar la consciéncia nacionala dei abitants d’Occitània.
Foncionarem de mai en mai coma un centre de ressorsas.
- Alestirem de ressorsas gratuiti —especialament sus Internet— per que lu abitants tròben d’informacions solidi sus Occitània, sus la sieu situacion de nacion, embai aspèctes politics, lingüistics, culturaus, economics e ecologics…
- Alestirem finda de plataformas d’entreajuda e d’incubacion de projèctes.
Es necessari de rendre accessibli toti aqueli ressorsas per far emergir, un jorn, un movement popular e nacionau occitan.
L’Assemblada Occitana es un movement de ciutadans. Es un grop de defensa dei interès populars. Siam de gents dau pòble e parlam en prioritat au pòble.
Siam complementaris dei autres movements occitanistas. Assajam d’elevar l’occitanisme a un nivèu maximau d’ambicion, de qualitat e de preséncia populara. E dins aqueu sens, siam “maximalistas”. Volèm preparar lo melhor futur possible per la populacion d’Occitània.
