by Dempuèi lo 15 d’octòbre, los departaments d’Aude e d’Eraur, en Bas Lengadòc, subisson d’inondacions tragicas qu’an fach 14 mòrts a Carcassona e dins de comunas a l’entorn. La comuna de Trebes es la mai murtrida amb sièis mòrts. Qualques jorns abans, ja i aguèt d’aigats amb de victimas mortalas dins lo centre de Provença (departament de Var).
Es en seguida de fòrtas pluèjas (equivalent a tres meses de pluèja tombats en cinc oras) que lo flume d’Aude a desbordat, en menant l’encontrada a una situacion de catastròfa naturala. Los degalhs se montan en milions d’èuros: mai de 1500 maisons privadas d’electricitat, un milièr de personas evacuadas, de camps inondats, d’estradas destruchas o impracticablas, de veïculs emportats. Lo departament d’Aude es mantengut en alèrta roja.
L’Assemblada Nacionala Occitana planh lo dòl e presenta lo sieu complet sosten a totas las victimas de las inondacions del Bas Lengadòc e de Provença.
Segon lo meteorològ Philippe Dobrinski, lo rescalfament climatic accentua la violéncia dels aigats en Mediterranèa. Per tant, es necessari de:
- Far evolucionar los sistèmas de prevencion e d’alèrta.
- Contrarotlar mai las construccions en zònas de risc.
- Arrestar lo betumatge e l’artificializacion dels sòls per fin que las tèrras absorbiscan melhor las aigas.
