by Nosautres de l’Assemblada Occitana volèm clarificar la pensada e l’accion a prepaus d’aquela guèrra atròça que tusta Palestina e Israèl.
En primier luòc: vivèm en Occitània. Occitània es un país que risca de desparéisser. L’occitan es una lenga que risca de morir. Nòstra lucha comença aicí: defendèm nòstre pòble occitan e nòstre país d’Occitània que vai daus Aups a l’Atlantic e de Borbonés aus Pirenèus.
En segond luòc: a prepaus dau conflicte dau Pròche Orient. Aicí en Occitània defendèm nòstres compatriòtas occitans d’origina jusieva e aràbia car subisson de las atacas creissentas. Son confrontats a de las agressions totalament inadmisiblas a causa de la guèrra israèloaràbia. Combatèm totas las formas de racisme antisemita e totas las formas de racisme antiarabi: an pas lor plaça en Occitània.
En treseime luòc: sèm priondament sensibles a las sofrenças atròças daus palestinians e daus israelians au Pròche Orient. Aprovam las accions de vertadiera solidaritat umanitària que s’organizan en Occitània per sosténer las populacions aràbias e israelianas. Chau metre fin a la guèrra, a la famina, a las captivitats d’ostatges e au fanatisme. Ne chau ’chabar emb la foliá criminala de Netanyahu, d’Hamas e d’Hizbullah. Sostenèm los democratas palestinians e israelians que vòlon la patz, la democracia e la prosperitat.
