by La question de las liasons entre Coni e Niça es a rejónher de nivèls escandalós. Un grèu problèma per nòstras Valadas Occitanas alpencas es la mancança de transpòrts publics adeqüats, capables de garentir aquelas liasons minimas vèrs las grandas vilas, tot en respectant l’environament e las populacions. Aquò es sensible especialament en Val Vermenanha e en Val de Ròia.
Una question grèva es la linha ferrroviària Coni-Niça (via Tenda e Ventemilha). Dempuei 2014 es abandonaa a son destin en avent solament 2 corsas per jorn de Coni a Ventemilha (7:51 e 15:00) e 2 corsas per jorn de Ventemilha a Coni (10:37 e 17:37). Aquò rend la linha escarsament frequentaa. Aquestes darriers ans, en mai d’aquò, los trens s’alentisson en Val Ròia fins a 30 km/h, çò que transforma lo viatge en torment. Ansin rendon inutilizabla la linha ferroviària, qu’es totun una de las 10 pus bèlas d’Euròpa.
La question del segond Tunèl de Tenda —lo Tenda Bis— dempuei tròp d’ans rend piégers los transpòrts entre Coni e Niça. Fai 20 ans que ne parlan, mas sa gestion es opaca e autoritària. Volèm pas que lo Tunèl de Tenda Bis entraïne la pèrda de nòstra bèla linha ferroviària, volèm pas nimai qu’entraïne la construccion d’una autoestraa que destruiriá lo païsatge. Lo vielh tunèl lo construguèron en 5 ans, de 1878 a 1882, mentre que lo nòu se prepara dins l’opacitat.
Revelhem-nos, reapropriem nòstras vidas. Nos plai de viure dins nòstras valadas. L’Assemblada Occitana sosten las revendicacions dels abitants. Volèm:
- La creacion d’un servici ferroviari occitan autonòm, gerit per los occitans e dins l’interès de las populacions alpencas occitanas, en particular dins l’interès de la Val Vernenanha e de la Val de Ròia.
- La preservacion e lo desvolopament de nòstra linha de tren Niça-Ventemilha-Tenda-Coni.
- La diminucion de la pollucion de l’aire, fòrça inquietanta, que ven dels camions.
- Lo mantenement d’una vida rurala, liura e qualitosa.
- Lo desvolopament de nòstras activitats artisanalas, agricòlas e pastoralas.
- Lo desvolopament d’un torisme respectuós de nòstras valadas alpencas.
- La preservacion de nòstre environament natural excepcional e de sa biodiversitat.
- Lo mestritge de la circulacion dels camions e de las automobilas, dins de proporcions suportablas per l’environament e per las populacions.
