L’Assemblada Occitana es un espaci de reflexion, d’escambi e d’accion dobèrt a totas las e totes los que desiran se mobilizar per sensibilizar e rassemblar la societat occitana per fin de faire reconéisser la nacion occitana dins sa diversitat culturala e lingüistica, de promòure una economia sobeirana, ecologica e sociala, e de crear las condicions politicas e socialas necessàrias a l’emergéncia d’una entitat territoriala occitana democratica e federativa.
Rejónher l’Assemblada Occitana, es faire la causida d’aderir a sas valors e d’agir per la restauracion de la dignetat nacionala occitana e la construccion d’una Occitània plurala, democratica e sobeirana, fondada sus las valors umanistas e lo drech dels pòbles a l’autodeterminacion. En aderissent, prenètz plenament part a aqueste combat collectiu.
Podètz aderir a l’Assemblada Occitana en tant que persona sòcia, collaboradora ò simpatizanta:
Adesion a l’Assemblada Occitana
Tota inscripcion coma sòci es somesa a l’obligacion de pagar un escotisson annual de 50€ (40€ per las personas en dificultat).
CARTA DE LAS VALORS DE L’ASSEMBLADA OCCITANA
Disponibla en PDF (dins totes los dialèctes occitans)
L’Assemblada Occitana es una associacion que vòl restaurar la dignitat nacionala d’Occitània. Vòl far d’Occitània un país liure. Vòl èsser l’ostal comun dels actors de la vida occitana. L’Assemblada Occitana se basa sus un sòcle minim de valors partejadas.
1. Respècte de la persona umana
L’Assemblada Occitana es pas compatibla amb las ideologias que nègan la valor universala de la vida umana. Las pensadas, las volontats e los actes qu’engendran la discriminacion, la negacion dels dreches umans, lo racisme, la misoginia e l’omofobia se tolèran pas dins l’Assemblada Occitana.
2. Defensa de la libertat e de la democracia
L’Assemblada Occitana s’estaca d’a fons als principis dels dreches collectius, a l’ideal democratic, a las libertats individualas e fondamentalas de la persona umana. Cap d’obstacle a aquelas valors se tolerarà pas dins l’associacion.
3. Reconoissença de la realitat occitana
L’Assemblada Occitana es una associacion que trabalha en lenga occitana e que favoriza lo refortiment de la personalitat occitana (los traches lingüistics, culturals o politics que pertòcan Occitània). Aqueles que nègan o que conoisson pas l’existéncia d’aquela occitanitat trobaràn pas lor plaça dedins l’Assemblada Occitana. E mai se l’Assemblada Occitana rassembla mai d’una concepcion de l’occitanitat, i vei un subjècte politic. L’Assemblada Occitana assumís aquel engatjament politic.
4. Esperit de consens
La pluralitat dels jutjaments e de las opinions, e de còps las garrolhas, fan partida de la vida normala d’un movement coma l’occitanisme, l’Assemblada Occitana o nèga pas. Ça que la, l’objectiu de l’Assemblada Occitana es de contribuir al trabalh comun e a la convergéncia dels actors en favor de l’occitanitat. Per tant, l’Assemblada Occitana cèrca pas d’empurar las diferéncias d’opinions: cèrca lo consens. Se demanda pas a las personas qu’intran dins l’Assemblada Occitana d’èsser d’acòrdi amb tot e amb tot lo mond. Per contra, se demanda a totes los sòcis de respectar l’Assemblada Occitana coma un luòc de rescontre per elaborar de projèctes comuns.
5. Dobertura
L’Assemblada Occitana vòl aculhir de gents d’orizonts diferents e, de còps, vòl tractar amb las personas estrangièras a l’occitanisme. Tolerància intèrna e pedagogia extèrna fan partida de nòstras valors.
6. Volontat
L’Assemblada Occitana cèrca bèl primièr de rassemblar los actors de l’occitanitat, sens pretendre de los remplaçar. L’Assemblada Occitana ela meteissa se projècta vèrs l’accion. Nos empenhon l’estrambòrd e l’enveja d’obrar a una vida occitana dinamica. Tot sòci de l’Assemblada Occitana participa als enjòcs de societat segon sas capacitats. Tot sòci de l’Assemblada Occitana promòu de longa las valors de l’occitanisme.
7. Actitud
Tot sòci de l’Assemblada Occitana se compòrta de manièra respectuosa e s’absten de tot acte immoral.
En signant aquesta carta, m’engatgi a n’aplicar lo contengut.
(Politica de confidencialitat – Vida privada e tractament relatius a vòstrei donadas personalas)