Sostengam Mirèlha Bòia e la lenga occitana fàcia a la deriva autoritària espanhòla!
Comunicat · 12.02.2018
La Vath d’Aran qu’ei ua tèrra de cultura occitana, restacada administrativament a Catalonha. Dus ahars estreitament liats qu’i deven atréger l’atencion urgenta de tots los democratas.
Lo Tribunau Constitucionau espanhòu que vien de proïbir l’usatge “preferenciau” de l’occitan aranés dens las institucions e administracions d’Aran. Qu’ei ua ataca contra la nòsta venerabla lenga occitana qui’s parla deus Aups a l’Atlantic. Qu’ei tanben ua ataca contra los dreits deus aranés, contra la semiautonomia d’Aran aplicada dempuish 1990 e contra la Lei de l’occitan de 2010.
Mirèlha Bòia (Mireia Boya) qu’ei una hemna occitana, aranesa e èx-deputada au Parlament de Catalonha de 2015 a 2017. Que defendoc dens aqueth Parlament, dab ua majoritat de deputats, la creacion d’ua Republica Catalana independenta dens la quau la Vath Aran e seré associada e respectada.
Uei Mirèlha Bòia que paga car lo son engatjament coratjós. Que cridam tots los democratas a la sostiéner.
- Qu’ei enseguida per lo jutge espanhòu Llarena per “rebellion”. Totun Mirèlha Bòia qu’a totjorn exprimit las suas opinions de manèra democratica e pacifica.
- Que recep miaças de destruccion contra lo jaç rurau Bòrda Guilhaumuc, qui’u tien dab lo son hrair en Aran, a Les, a causa de rumors faussas veïculadas per lo jornau espanhòu OK Diario. Que son estats forçats de barrar lo lor jaç.
Aqueras miaças be son l’expression d’ua deriva autoritària de l’estat espanhòu, qui non supòrta pas que los catalans e los occitans d’Aran e demanden la lor libertat. Que sostienèm Mirèlha Bòia e mei tots los militants aranés e catalans qui son miaçats, uei, per lo poder repressiu de Madrid. En particular, que cridam tots los democratas e tots los abitants d’Occitània, deus Alps a l’Atlantic, a participar a las accions seguentas o aumens a las sostiéner:
- Marcha de tesas, dimars 13 de heurèr, a 20h30, en Aran, a Les, sus la Plaça de la Comuna, dab lo lèma “Mirèlha èm dab tu”.
- Lo medish ser, puish, despart en autobús de Les, en Aran, entrò a Madrid, entà sostiéner Mirèlha Bòia davant lo Tribunau Suprèm espanhòu e fàcia au jutge Llarena, dens la jornada deu 14 de heurèr.
- Signatura deu Manifèst de sostien a Mirèlha Bòia qui podètz legir dens diferents mèdias e qui avèm publicat sus lo nòste sit. Que podètz signar aqueth manifèst en escrivent a Accion Culturala Occitana (acc.culturoc@gmail.com) o ben aus mèdias Jornalet (info@jornalet.com) e Aquò d’Aquí (aquodaqui@aquodaqui.info).
Tota ataca contra Aran qu’ei ua ataca contra l’ensemble deu país d’Occitània, deus Aups a l’Atlantic. Tota ataca contra la nòsta deputada Mirèlha Bòia qu’ei ua ataca contra l’ensemble deu pòble occitan. Que tieneram targa, que’ns defenderam.
***
Units per Occitània
***
ASSEMBLADA NACIONALA OCCITANA
13090 AIS DE PROVENÇA
www.assemblada.org
info@assemblada.org
+33 6 46 62 74 93
