Posicion de l’ANÒC sus lo futur nom de la region Lengadòc-Rosselhon-Miègjorn-Pirenèus
Comunicat · 13.04.2016
L’Assemblada Nacionala Occitana entend intervenir dins lo debat sus los noms de las nòvas regions per presentar lo sieu ponch de vista.
Despuèi de meses s’espandís l’idèa d’apelar “Occitània” la nòva region eissida de la fusion entre Lengadòc-Rosselhon e Miègjorn-Pirenèus. D’un costat, seriá l’unica escasença per Occitània d’aver enfin una entitat territoriala que portèsse lo sieu nom. Mas de l’autre, apelar “Occitània” un territòri limitat essencialament a Lengadòc, una part de Guiana e un tròç de Gasconha, revendriá a exclure d’Occitània totes los autres païses d’òc (Provença, Niça, Païses Alpencs, Auvèrnha, Lemosin e Gasconha aquitana), çò que constituiriá una regression.
En defòra d’aquò, lo debat a l’entorn del futur nom es en realitat una tela de fum per far esquivar lo vertadièr problèma: la reforma territoriala entamenada per l’estat francés càmbia gaire la situacion de las regions que demòran de “regions-quimèras” sens personalitat istorica e eissidas de retalhadas arbitràrias purament tecnocraticas. Las fusions son estadas realizadas del meteis biais sens consultar l’avís de la populacion e de las collectivitats localas. Aquò constituís una mancança de democracia denonciada per lo Conselh d’Euròpa. Enfin, aquela reforma levarà pas los problèmas estructurals de las regions: mancança d’autonomia, feblesa economica, problèma budgetari…
L’ANÒC, que milita per una entitat unica per Occitània que recampe totes los païses d’òc, non se pòt satisfaire de las règlas d’aquel jòc tecnocratic qu’es vertadièrament una “excepcion francesa”.
Considerant totun que l’union de totas las províncias d’òc se farà per estapas e que la reforma territoriala n’es una primièra, e conscienta doncas de l’enjòc que representa la nominacion futura de las nòvas regions, l’Assemblada Nacionala Occitana preconiza per la nòva region eissida de la fusion de Miègjorn-Pirenèus e Lengadòc-Rosselhon un nom que faga almens mençon de la siá occitanitat.
***
Units per Occitània
***
ASSEMBLADA NACIONALA OCCITANA
13090 AIS DE PROVENÇA
www.assemblada.org
info@assemblada.org
+33 6 46 62 74 93
