Libertat per Puigdemont, Ponsatí e tots los exiliats catalans
Comunicat · 01.04.2018
La recenta arrestacion de Carles Puigdemont en Alemanha preocupa beucòp l’Assemblada Nacionala Occitana (ANÒC). Carles Puigdemont, president elegit e legitim de Catalonha, coneis un exili forçat a travèrs d’Euròpa. Dusca aura a pogut viatjar sens èsser inquietat en Belgica, Soïssa, Danemarc, Suècia e Finlàndia.
Per tant, quò es inacceptable qu’un estat coma Alemanha, que se pretend un modèl de democracia, entrepache la libertat de circulacion dau president catalan.
Los pretenduts “delictes” que l’estat espanhòu vòu imputar a Puigdemont, e que motivan l’arrestacion en Alemanha, an pas de realitat juridica. Espanha enfranh lo principi democratic de separacion daus poders. La justícia espanhòla manca de credibilitat perque se somet aus òrdres dau poder executiu espanhòu, qu’es plen de reflèxes franquistas.
En parallèl, Clara Ponsatí, dirigenta catalana exiliada en Escòcia, subís maitot de las pressions e daus contraròtles de part de la justícia britanica, a la demanda d’Espanha. Quò es egalament preocupant.
Demandam a Alemanha, au Reialme Unit e a l’ensemble de las democracias europèas de respectar la volontat democratica daus catalans per lor libertat. Lor demandam de garentir la liberat de movement daus exiliats catalans e de far pression per qu’Espanha cèsse de reprimir Catalonha.
***
Units per Occitània
***
ASSEMBLADA NACIONALA OCCITANA
13090 AIS DE PROVENÇA
www.assemblada.org
info@assemblada.org
+33 6 46 62 74 93
