L’Assemblada Occitana participa a las Jornadas Internacionalistas d’Occitània a Tolosa

Los 8, 9 e 10 de març 2019 se debanaràn a Tolosa las primièras Jornadas Internacionalistas d’Occitània. Las jornadas se debanaràn al 42 Carrièra dels Blanquièrs, 31000 Tolosa.

La lucha occitana es a una virada. D’un costat lo sentiment occitan torna nàisser e de l’autre l’occitanisme a besonh de se tornar fondar. Aquesta situacion de crisi nos permet de nos tornar pensar, de soscar dins lo fons a nòstras errors, malparadas et reüssidas. Es per çò que la politica, valent a dire qual ten lo poder d’organizar la societat es al còr de tota causa, que pensam que l’occitanisme se deu tornar politizar. Es lo sens primièr d’aquestas jornadas, d’encontres politics occitanistas.

Internacionalistas perque nòstra lucha es mondiala, l’imperialisme neocoloniza sempre mai los pòbles del Mond. En Exagòn, la situacion de las nacions istoricas sens Estat es catastrofica. Es pr’amor que lo pòble occitan poirà pas avançar solet fins a sa liberacion que nos cal ligar amb totes los pòbles en lucha, d’aquí o d’endacòm mai. L’imperialisme francés a fach que partejam nòstra tèrra amb d’umans originaris de las ancianas colònias, nòstra liberacion collectiva pòt sonque passar per una presa en compte de totes aquestes factors nòus, de totas aquestas luchas.

L’occitanisme es pas una malescasuda e es encara mens mòrt. Mai d’una publicacion o reflexion, aquestas darrièras annadas, son la pròva de la vivacitat e de la volontat de bastir un occitanisme politic nòu. L’ora es a la reflexion, a la discussion, al partatge, l’ora es a las primièras Jornadas Internacionalistas d’Occitània.

Divendres

19h00 – Debat sus la necessitat d’un occitanisme femenin.

Lo 8 de març es lo Jorn Mondial de las Femnas en lucha. Recaçam aquesta occasion per organizar una taula redonda sus l’occitanisme e la lucha femenina. La lucha de las femnas es pas presenta dins lo combat occitanista e pr’aquò las femnas que son al còr del movement especialament pel biais de las Calandretas (maires engatjadas, regentas, etc.) e del movement cultural. L’occitanisme a de se tornar pausar aquesta question e de la tornar plaçar al centre de la lucha.

D’intervenentas eissidas del movement occitanista seràn presentas.

Dissabte

9h30 – Corsets jaunes d’Occitània: un territòri en revòlta (durada: 2h30)

Lo movement dels corsets jaunes ven dobrir una novèla temporada de la lucha de las classas en Exagòn mas tanben en Occitània. D’occitanistas organizats èran presents al còr del movement. Occitània es particularament tocada per aqueste movement mentre que i a pas de revendicacion plan occitanista. L’intensitat del movement en cò nòstre s’explica per mai d’una problematica pròpria (nacion somesa sens poder, la seculara division vila-campanha, mas tanben metropòlis-perifèrias, París-“províncias”) al pòble occitan e a Occitània. 

Vos prepausarem donc una analisi istoricopolitica e sòcioeconomica del movement dels corsets jaunes. Serà seguida d’una discussion a l’entorn de la necessitat de l’implicacion de l’occitanisme (politic e cultural) dins lo movement social. Los corsets jaunes tanben qu’an d’utilizar divèrses mejans d’accion que l’occitanisme se’n poiriá apoderar.

Miègjorn – Restauracion

13h30 – L’occitanisme cap a una novèla èra politica (durada: 2h30)

L’occitanisme viu un cambiament prigond. Sèm a l’ora d’una virada istorica ont lo politic deu tornar al centre del projècte occitanista. Los occitanistas afirman que l’occitanisme es en crisi, mas una crisi es un momentòt, e que produtz los espleches de son despassament. Prepausam un debat ont mai d’un actor politic de l’occitanisme partejaràn lo lor ponch de vista.

[De representants de l’Assemblada Occitana participaràn a aquesta conferéncia coma intervenents al subjècte de lor dorsièr sus la crisi de l’occitanisme.]

16h00 – Pausa 30 minutas

16h30 – Liberacion nacionala e Estat francés, quin camin? (durada: 2h)

La question nacionala dins son ensemble crespa lo debat politic: independentisme, regionalisme, autonomisme o soleta revendication culturala prenon de proporcions desmesuradas dins la republica francesa. Aquò mòstra qu’aquestas questions son luènh d’èsser subsidiàrias e son al còr del problèma francés. Son doncas una linha de demarcacion centrala dins lo camin cap a la construccion d’una societat novèla. Las nacions dominadas an doncas un ròtle de primièr òrdre per bastir un mond novèl.

A l’entorn d’aquesta idèa, recebrem d’organizacions de nacions sens estat de l’Estat francés. L’objectiu es de téisser de ligams per un internacionalisme interior e d’escambiar sus nòstras experiéncias. 

18h30 – Fin de la discussion

18h45 – Acte simbolic

19h00 – Aperitiu e musica

22h00 – Fin de la jornada

Dimenge

Vèspre – L’eleccion de Bolsonaro en Brasil foguèt una estomagada per fòrça democratas e revolucionaris dins lo Mond. Vos prepausarem una analisi per comprene aquela eleccion, son contèxt e sos enjòcs. Vos prepausarem una presentacion de la lucha dels païsans sens tèrra en Brasil, còr del movement revolutionari brasilièr.

Per mai d’informacions sus aquestas Jornadas, podètz contactar l’organizacion per e-mail a: jioc@protonmail.com

***

En 2019, l’Assemblada Nacionala Occitana deven l’Assemblada Occitana.