L’ANÒC sosten l’accion per revendicar l’occitan al MUCÈM
Comunicat · 23.11.2016
« Se prepara a Marselha, lo 17 de decembre que ven, una accion de protèsta contra lo mesprètz de l’occitan al MUCÈM, lo Musèu de las Civilizacions d’Euròpa e de la Mediterranèa. Desplegaràn de 12h a 16h davant lo musèu una bandeiròla de dos mètres que pòrta en occitan l’article 14 de la Declaracion Universala dels Dreches Umans, e se repartirà un fuelh qu’explicarà la revendicacion de l’accion:
“Quand a Marselha, la pus granda vila d’Occitània, lo MUCÈM presenta en sèt lengas l’article catòrze de la Declaracion Universala dei Drechs Umans, l’abséncia de version dins nòstra lenga occitana es una marca fòrta de desconsideracion per leis occitanofòns conscients de la valor de sa lenga especifica. Mostram donc uei lo tèxte que volèm veire escrich sus lei parets dau MUCÈM au costat dei versions alemanda, anglesa, aràbia, castelhana, francesa, grèga e italiana”
Lo MUCÈM s’inaugurèt lo 7 de junh de 2013 a Marselha dins l’encastre de las activitats de la Ciutat Focèa coma Capitala Europèa de la cultura. Bastit sus de tèrras ganhadas sus la mar, lo sit cèrca d’èsser un espaci màger d’analisi e interaccion de las divèrsas civilizacions de Mediterranèa long de l’istòria, mas ont la lenga e la cultura del país son pas brica presentas. “Sos conceptors nos impausan una vision francofrancesa d’una cultura tecnocraticament formatada a París”, çò planh Josiana Ubaud dins una letra dobèrta als conservators del MUCÈM. Dins aquela letra, Ubaud se mòstra completament indignada a prepaus de l’abséncia de la lenga e la cultura del país, e critica la vision dels faches mediterranèus segon un “prisma desformant qu’a quitament pas la decéncia —a defaut de la conviccion— de valorizar un tant siá pauc la vila e la region d’aculhença del musèu”. L’Assemblada Nacionala Occitana sostèn l’accion per revendicar l’occitan au MUCEM » (Sorsa: Lo Jornalet)
L’Assemblada Nacionala Occitana sosten l’accion per l’occitan au MUCÈM e apèla a i participar lo 17 de decembre que ven!
***
Units per Occitània
***
ASSEMBLADA NACIONALA OCCITANA
13090 AIS DE PROVENÇA
www.assemblada.org
info@assemblada.org
+33 6 46 62 74 93
