Catalonha #21D: victòria de la democracia contra l’autoritarisme de Madrid
Comunicat · 22.12.2017
Dijaus 21 de decembre que’s tengón en Catalonha las eleccions ditas autonomicas, que lo govèrn espanhòu dirigit per Mariano Rajoy (Partit Popular, dreta autoritària) las avèva convocat après aver destituit lo govèrn e dissolgut lo Parlament de la Generalitat.
Aqueras eleccions que’s son debanadas dens un contèxt desfavorable per las fòrças independentistas, pr’amor que la campanha èra destorbada per las divèrsas mesuras autoritàrias deu poder madridenc: un lidèr en exili (Carles Puigdemont, president d’Ensems per Catalonha), un aute en preson (Oriol Junqueras, president d’ÈRC, Esquèrra Republicana de Catalonha), pressions mediaticas, martelatge electorau deu partit unionista Ciutadans, etc.
Maugrat totas aqueras constrentas, las eleccions qu’an miat a ua neta victòria de las fòrças independentistas, ja qu’acomolan lo 47,5% deus vòtes e 70 deputats elejuts, contra lo 42% e 57 deputats per l’ensems de las listas unionistas e lo 7,5% e 8 deputats per Podem, partit d’esquèrra dab posicions indefinidas. Lo taus de participacion qu’èra deu 82%.
Aqueths resultats que ns’ensenhan las leiçons seguentas:
- Las fòrças independentistas que guardan la majoritat absoluda maugrat que pèrdian 2 deputats a respècte de las eleccions de 2015.
- Lo vòte independentista qu’a obtengut un recòrd en nombre de votz: 2.063.361 votz lo 21 de decembre, sia quasi 96.000 de mei qu’en 2015.
- La participacion massissa qu’a provat que non i avèva pas nada “majoritat silenciosa unionista”, contràriament a çò qui pretendèvan los mèdias espanhòus e francés.
- Tanben s’an ganhat 6 deputats de mei a respècte de 2015, las fòrças unionistas que demòran encara minoritàrias, tant en nombre de votz (1.889.176) coma de deputats.
- Lo Partit Popular, partit deu govèrn espanhòu, que s’ei completament prefondat.
- La repression e las entravas deu poder madridenc non s’i son pas escasudas entà prefondar la capacitat de mobilizacion deu camp independentista qui s’ei pogut impausar.
L’Assemblada Nacionala Occitana be saluda aquera victòria electorala qui restaura la legitimitat deu govèrn independentista de Carles Puigdemont. E qu’esperam que los govèrns espanhòu e francés e l’Union Europèa e reagiscan positivament en rendent au pòble catalan lo son dret d’autodeterminacion e en reconeishent enfin la Republica de Catalonha, proclamada lo 27 d’octòbre passat.
***
Units per Occitània
***
ASSEMBLADA NACIONALA OCCITANA
13090 AIS DE PROVENÇA
www.assemblada.org
info@assemblada.org
+33 6 46 62 74 93
